اسلام آباد۔ 04 جولائی (اے پی پی) ملک اٹی مواصلات نا بشخ اٹی براہ راست درملکی زرکاری ٹی تدوک آ مالی سال انا اولیکو 11 تُو اٹی پیوستہ مالی سال انا مقابلہ ٹی کمتی ریکارڈ کننگانے۔ زرکاری بورڈ انا کنڈآن دا بابت جاری کروک حساب وکتاب نا رداٹ مالی سال 2022 نا اولیکو11 تُو اٹی ملک اٹی مواصلات نا بشخ اٹی 96.4 ملین ڈالر نا براہ راست درملکی زرکاری ریکارڈ کننگا ہرا مالی سال 2021 نا ہند امد انا مقابلہ ٹی 12.55 درسد کم ءُ، مالی سال 2021 نا اولیکو11 تُو اٹی ملک اٹی مواصلات نا بشخ اٹی 108.5 ملین ڈالر نا براہ راست درملکی زرکاری ریکارڈ کننگاسس۔ مئی 2022 اٹی ملک اٹی مواصلات نا بشخ اٹی براہ راست درملکی زرکاری نا کچ 42.3 ملین ڈالر ریکارڈ کننگاسس۔ حساب وکتاب نا رداٹ تدوک آ مالی سال انا اولیکو 11 تو اٹی ملک اٹی انفارمیشن ٹیکنالوجی نا بشخ اٹی 135.3 ملین ڈالر نا براہ راست درملکی زرکاری ریکارڈ کننگا ہرا مالی سال 2021 نا ہند امد انا مقابلہ ٹی 110.41 درسد زیات ءُ، مالی سال 2021 نا ہندا مد اٹی ملک اٹی انفارمیشن ٹیکنالوجی نا بشخ اٹی 64.3 ملین ڈالر نا براہ راست درملکی زرکاری ریکارڈ کننگاسس، مئی 2022 اٹی ملک اٹی انفارمیشن ٹیکنالوجی نا بشخ اٹی 4.9 ملین ڈالر نا براہ راست درملکی زرکاری ریکارڈ کننگانے۔ حساب وکتاب نا رداٹ تدوک آ مالی سال انا اولیکو 11 تُو اٹی ملک اٹی سافٹ ویئر ڈویلپمنٹ نا بشخ اٹی 43.9 ملین ڈالر و آئی ٹی خذمت آتا بشخ اٹی 90.4 ملین ڈالر نا براہ راست درملکی زرکاری ریکارڈ کننگانے۔
