اسلام آباد۔ 01 جولائی (اے پی پی) وزیراعظم شہباز شریف قومی پالیسی تیٹی السی شمولیت کن ’’انوویشن ہب‘‘ انا بناءِ کرے وخت اس کہ وزیراعظم پارے کہ غٹ وزارت و محکمہ غاتیٹی اسہ سیل اس جوڑ کینہ ہراڑے ہشار و باصلاحیت ورناتے اوار کننگک ہرا پوسکنءُ آئیڈیا ایترہ و اوفتے قومی پالیسی سازی ٹی اوار کینہ۔ جمعہ نادے آ وزیراعظم شہباز شریف بٹن ءِ خلسا انوویشن ہب انا بناءِ کرے۔ داوخت آ وزیراعظم شہباز شریف بشخ ہلوک آتا ستاءِ کرسا پارے کہ دا اسہ انقلابی ءُ پروگرام اسے ، ننا راج اٹی پالیسی سازی ٹی چاہندار آتا کڑد انا کمتی ءِ ، داپروگرام نا مسخت پاکستان تون اوار مچ آ دنیا ٹی ہشار و قابل پاکستانی تے پالیسی سازی نا المی بشخ کننگ ءِ ہراڑآن پوسکن آ خیال آتے پالیسی سازی ٹی اوار کننگ اٹ کمک رسینگک۔ اوپارے کہ پوسکن آ علم، پٹ وپول و آزموندہ نا اینو نا دور اٹی بھاز قدرو منزلت ءِ ، دا خلیج ءِ پُر کننگ کن دا پروگرام نا بناءِ کننگانے۔ وزیراعظم پارے کہ او ذاتی وڑاٹ دا پروگرام ءِ تالان کیک و قوم انا ہشار ورناتا است بڈی ءِ کننگک۔ وزیراعظم پارے کہ اگہ داپروگرام اٹ بزرگ شاری تا کنڈآن ہم پبی سلاہ و آئیڈیا بس تو اوفتا ستاءِ کینہ و اوفتیا عملدرآمد کننگک۔ اوپارے کہ ننا کوشست ءِ کہ پاکستان ہر لحاظ اٹ شون ہلے و پوسکن آ دور انا خواست آتون ہم گرنچ مرے، دنیا پٹ وپول و پوسکن آ تعلیم اٹ آسمان آ سرمننگ ءِ ، ہموڑے پٹ وپولی مطالعہ نوشتہ کننگک و اوفتیا شرہ کرسا آئیڈیا غاتیان فائدہ ہرفنگک، داوخت آ وزیراعظم سٹریٹجک ریفارمز نا سروک سلمان صوفی پارے کہ وزیراعظم نا پبلک پالیسی نا گام گیج ہراالس نا براہ راست فائدہ نا بابت ءُ اوفتے ٹی الس نا براہ راست شمولیت آن اوفتا ویل ایسر مرے، ہندا چرجوئی ٹی وزیراعظم نا پرمان تیا انوویشن ہب انا بناءِ کننگ انگ ءِ ، نن الس ءِ پبلک پالیسی ٹی شریک کننگ اُن، دا انوویشن ہب انا کمک اٹ الس نا کنڈآن بروک آ جتا آئیڈیا تے وٹ کننگک و گچین آئیڈیا تروک آتے 14 اگست آن پی ٹی وی آ بناکروک آ پروگرام اٹی بٹنگک و او تینا آئیڈیا تے قوم انا مون آ تخرہ ہرافتیان گچین آئیڈیا زقومی پالیسی نا بشخ مریرہ، وخت اس کہ دا آئیڈیا تے وزیراعظم ءِ پیش کننگک و اودا فتیا انعام ایتک۔ اوپارے کہ الس نا کنڈآن بروک آ چندی سلاہ تیا سجفنگ کن پروفیسر فیصل باری، مشرف زیدی، شارخ خلیل، عائشہ رضافاروقی و شیزاغا تالان کمیٹی اس جوڑ کننگانے، وزیراعظم سٹریٹجک ریفارمز یونٹ داڑآ عملدرآمد کیک۔ داوخت آ بشخ ہلوک آک ہم تینا سلاہ تے تسر۔ آغاخان ڈویلپمنٹ نا نمائندہ گل چین عاقل وزیراعظم ءِ مخاطب کرسا پارے کہ نما تدوک آ حکومت زالبول آتے واکدار کننگ نا ہرا گام گیج آتے کننگاکہ او نما ہِننگ آن پد سیست نا گواچی مسر۔ بشخ ہلوک آتا کنڈآن سلاہ تننگا کہ گوگل و فیس بک پاکستان آن ہراسرمایہ ءِ کٹیا کرسا دننگ ءُ اوفتیا ہم بایدے خراج خلنگے ۔ نصاب اٹی ٹیکنالوجی ءِ اوار کننگے، زالبول آتے سکلز ترسا اوفتے راج انا واکدار شاری جوڑ کننگ مریک۔ سیل و سوات نا مون آ دننگ کن ہوٹلنگ انڈسٹری نا بابت پیدواری پالیسی اس اتنگے۔ وزیراعظم داوخت آپارے کہ نن ہمو کنڈآ سجفنگ اُن، دفترآتا معمول نافائل ورک انا سوب آن پوسکن آ آئیڈیا تا کمتی ءِ او بیرہ ہڑدے ئی باندات آتے ہریرہ ہنداخاطرآن وزارت توانائی، پیٹرولیم ، خزانہ تون اوار ایلو وزارت و محکمہ غاتیٹی اسہ سیل اس جوڑ کننگک ہراڑے ہشار و قابل مخلوق ءِ تولفہ ہرا تینا آئیڈیا تے ایترہ۔ یات سلے کہ انوویشن ہب ءِ ملکی تاریخ اٹی اولیکو بار قومی پالیسی تیٹی السی شمولیت کن جوڑ کننگانے، وزیراعظم نا پالیسی جوڑ کننگ نا عمل اٹ غٹ اسٹیک ہولڈر آتا سلاہ ءِ اہمیت ملک۔ باصلاحیت ورناک افرادی قوت نا کڑد ءِ اہمیت تننگ کن ہب ءِ جوڑ کننگانے، انوویشن ہب انا جوڑ کننگ پالیسی سازی و ملکی و السی گرج آتے ہم گرنچ کننگ اٹ کڑد ادا کیک۔
