اسلام آباد۔ 01 جولائی (اے پی پی) وزیراعظم محمد شہباز شریف پاکستان آن آئی ٹی برآمد آتیٹی ودکی ٹی پیشن نا ملک رہینگوک آ پاکستانی تا کڑد آ است جمی نا درشانی ءِ کرسا پارینے کہ او ملک اٹی آئی ٹی انڈسٹری نا مون آ دننگ اٹ تینا کڑد ءِ ادا کیر داڑآن ملک اٹی آئی ٹی ایکسپورٹ اٹی ودکی مریک۔ وزیراعظم میڈیا آفس آن جاری بیان نا رداٹ وزیراعظم داخیال آتا درشانی ءِ جمعہ نادے آ داڑے پاکستانی پوریاگر آتا تنظیم سیلیکون ویلی کیلفورنیا نا صدر جنید قریشی تون گپ وتران کرسا کرے ہرا اوڑتون داڑے اوڑدہی کرے۔ داوخت آ بنجائی وزیر حوالکاری و شینکاری مریم اورنگزیب ہم ساڑی ئسک۔ اوڑدہی ٹی پاکستان نا آئی ٹی ایکسپورٹ انڈسٹری و پاکستان اٹی آئی ٹی /آئی ٹی ای ایس سیکٹر نا اہمیت و اودے 2.5بلین ڈالر آن ودفسا 15 بلین ڈالر نا صنعت جوڑ کننگ نا گمان تیا گپ وتران کننگا۔ اوڑدہی ٹی سیلیکو ویلی ٹی رہینگوک پاکستانی پردیسی تا اہمیت ءِ ہم مون آ تخنگا۔ وزیراعظم پاکستان اٹی آئی ٹی برآمد آتیٹی ودکی ٹی پاکستانی تاکڑد آ است جمی نا درشانی ءِ کرے۔ اوجنید قریشی نا ہم است بڈی ءِ کرے کہ او پاکستان اٹی آئی ٹی انڈسٹری نا مون آ دننگ اٹ تینا بشخ ءِ شاغے۔ جنید قریشی ’’ٹیک ڈسٹینشن پاکستان ‘‘ نا جہانی مہم آہم شرہ کرے و پارے کہ حکومت کن دا اخس المی ءِ کہ او مارکیٹنگ مہم اٹی بھاز زیات زرکاری کے تانکہ جہانی کہول آ نمان ہند اس دوئی کننگ مرے۔ جنید قریشی وزیراعظم ءِ ستمبر اٹی اقوام متحدہ نا دورہ ٹی سیلیکون ویلی نا دورہ ءِ کننگ و سیلیکون ویلی نا پنی آ ٹیک کمپنی تا راہشون تتون ملنگ وپاکستان ءِ دنیا نا ’’ٹیک ڈسٹینیشن پاکستان ‘‘ نا وڑاٹ پیش کننگ نا سلہ خلک۔ اوڑدہی ٹی آئی ٹی پالیسی تیٹی گچینی کن سلاہ غاتیا ہم سجفیر ہرافتے تینا کننگ آن ملک اٹی آئی ٹی ایکسپورٹ نا شونداری ءِ پین سوگوی ملنگ کیک۔ اوڑدہی ٹی مائیکرو ڈگری و گونڈ سرٹیفکیٹ آتا اہمیت آ ہم گپ وتران کننگا و پاننگاکہ دا ورناتے آئی ٹی انڈسٹری ٹی بھرتی کننگ نا قابل کننگ اٹ اخہ در فائدہ مند مننگ کیک۔
