اسلام آباد۔ 30 جون (اے پی پی) وزیراعظم شہباز شریف چین نا کمیونسٹ پارٹی نا ڈائریکٹر خارجہ امور کمیشن یانگ جیچی و اونا ڈل ءِ بخیر کرسا پارے کہ یانگ جیچی پاکستان نا مخلص سنگت ءِ و او پاکستان نا حکومت و الس نا کنڈآن چینی ڈل ءِ بخیر اٹ پاہک۔ وزیراعظم شہباز شریف تون کمیونسٹ پارٹی آف چا ئنا نا ڈائریکٹر خارجہ امور کمیشن یانگ جیچی نا کماشی ٹی ڈل اوڑدہی کرے۔ داوخت آ وزیر خارجہ بلاول بھٹو زرداری ، وزیر مملکت حنا ربانی کھر، بنجائی وزیر ڈٹ بندی وشونداری احسن اقبال و ایلوفک ہم ساڑی ئسر۔ وزیراعظم پارے کہ او پاکستان نا حکومت و الس نا کنڈآن چینی ڈل انا ستاءِ کیک۔ اویانگ جیچی تون 2015ء ٹی چینی صدر نا دورہ نا وخت آ مروک آ اوڑدہی نا ذکر ءِ کرسا پارے کہ چینی صدر نا ڈل انا ہم باسک انا حیثیت اٹ یانگ جیچی اہم کڑد ادا کریسس، چین اتون نن ہمووخت آ چندی معاہدہ غاتیا دستخط کریسن ہرا دراسل سی پیک نا بنائسک۔ وزیراعظم پارے کہ یانگ جیچی پاکستان نا مخلص سنگت ءِ ہرا مدام پاکستان نا کاز انا مخ تفی ءِ کرے و ہڑتوم آ ملک آتے خڑک اتنگ اٹ اہم کڑد ادا کرے۔ وزیراعظم تینا دورہ بیجنگ نا ہم ذکر ءِ کرے ہراتم اونا یانگ جیچی تون اوڑدہی مس۔ اوپارے کہ سی پیک نا ڈٹ، زرکاری و واپار کن اونا منت وار اُن۔ یانگ جیچی چینی صدر و وزیراعظم نا کنڈآن نیک است خواہی نا کلہو آتے سرکرے و دااومیت نا درشانی ءِ کرے کہ وزیراعظم شہباز شریف نا کماشی ٹی پاکستان راجی و اقتصادی شونداری نا کنڈآ کاہک۔
