اسلا م آباد۔ 30 جون (اے پی پی) وزیراعظم شہباز شریف پارینے کہ سیوتی حکومت زرکاری نا مون آ دننگ کن اڑاند آتے مر کننگ کن گام گیج کننگ ءِ، چین پاکستان اقتصادی کمکاری ءِ پین ودفنگ پاکستان نا راجی و اقتصادی شونداری کن اہم ءِ، چینی کمپنیک پاکستان اٹی قابل تجدید توانائی خاص وڑاٹ شمسی توانائی نا گیشتر گمان تیٹی زرکاری کیر۔ پنچ شنبے نادے آ وزیراعظم آفس میڈیا ونگ آن جاری بیان نا رداٹ چینی سرکاری کمپنی نورینکو نا بڑزکو واکداری ڈل وزیراعظم تون اوڑدہی کرے۔ ڈل انا کماشی ءِ نورینکو انٹرنیشنل نا نائب صدر وانگ شیاؤبنگ و سی ای او نور ینکو انٹرنیشنل (پاکستان) لی چن کرے۔ اوڑدہی ٹی بنجائی وزیر خواجہ سعد رفیق، سید نوید قمر، چوہدری سالک حسین، وزیراعظم نا سلاہکار احد چیمہ، وزیراعظم نا خصوصی کمکار سید طارق فاطمی، محمد جہانزیب خان، ظفرالدین محمود و تعلقدار وزارت آتا کمامدارآک ہم ساڑی ئسر۔ داوخت آ ڈل اتون گپ وتران کرسا وزیراعظم محمد شہباز شریف پارے کہ چین پاکستان اقتصادی کمکاری ءِ ودفنگ پاکستان نا راجی و اقتصادی شونداری کن اہم ءِ۔ چین پاکستان اقتصادی راہداری ڈٹ (سی پیک) ہڑتوم آ سنگت ملک آتا تین پہ تینی فائدہ و شونداری کن بدلی نا ڈٹ انا وڑاٹ اہم ڈٹ اسے۔ او چینی کمپنی تے پاکستان اٹ قابل تجدید توانائی خاص وڑاٹ شمسی توانائی نا گیشتر گمان تیٹی زرکاری نا سلہ خلک۔ وزیراعظم لاہور اورنج لائن میٹرو ٹرین ڈٹ اٹی کمپنی نا کڑد انا ہم ستاءِ ہم کرے ہرا لاہور اٹی ہڑدے ئی بنداو آ لکھ آ مسافر آتے آسراتی فراوان کننگ ءِ۔ اویات ترفے کہ داوڑ اولیکو وار ئس کہ جی ٹو جی پروجیکٹ یعنی لاہور اورنج لائن اٹی کھلی بولی خلنگا۔ اوپارے کہ غٹ آن کم بولی تروک آ کمپنی تون پین مذاکرات نا نتیجہ ٹی 600 ملین امریکی ڈالر نا بچت مس، دایقینا پاکستان نا شونداری نا تاریخ اٹی اسہ مزل نا نشان اسے۔ ڈل پاکستان ءِ ساڑی زرگزرانی تنکی آن کشنگ کن وزیراعظم شہباز شریف نا سخت کوشست آتا ستاءِ کرسا پارے کہ وزیراعظم شہباز شریف چین نا عظیم سنگت ءِ ہرانا کاروبار دوست پالیسیک اقتصادی کمکاری ءِ پین سوگو کرینے و ملک اٹی براہ راست درملکی زرکاری ءِ آسان جوڑ کرینے۔ نورینکو نا ڈل پاکستان اٹ قابل تجدید توانائی نا ڈٹ آتا گیشتر وارخواہی آن فائدہ ہرفنگ کن دا بشخ اٹی زرکاری کننگ اٹ بھاز است خواہی ظاہر کرے، کمپنی خاص وڑاٹ ٹھٹھہ ٹی ونڈکوریڈور ہرانا رداٹ 100 میگاواٹ نا ونڈو پاور پروجیکٹ سلاہ کننگاسس ٹی زرکاری اٹ است خواہی ظاہر کرے۔ داڑتون اوار اوار ریلوائی لائن تتون فائبر آپٹک اٹ زرکاری، تانبہ و این نا کانڑ کنی و ملک انا بھلا شار تیٹی انفراسٹرکچر نا شونداری ٹی زرکاری نا وارخواہی اوار ئسر ہرانا کمپنی زرکاری نا ممکنہ ہند آتا وڑاٹ پیدواری کرے۔ وزیراعظم پارے کہ پاکستان زرکاری کن سازگار ءِ و اونا حکومت زرکارآتے پین آسراتی کن غٹ اڑاند آتے مر کننگ کن گام گیج کننگ ءِ۔ وزیراعظم چینی صدر شی جن پنگ و وزیراعظم لی کیانگ نا کنڈآن پاکستان نا پدریسہ و بدل مفروک مخ تفی خاص وڑاٹ پاکستان نا ساڑی زرگزرانی حالیت آتیٹی کمک آ منت واری ءِ ہرفے۔
