اسلام آباد۔ 30 جون (اے پی پی) وائس چانسلر اسلامیہ یونیورسٹی بہاولپور انجینئر پروفیسر ڈداکٹر اطہر محبوب بنجائی وزیر صنعت و پیدوار مخدوم سید مرتضیٰ محمود تون اوڑدہی کرے۔ بنجائی وزیر ءِ اسلامیہ یونیورسٹی بہاولپور نا تدریسی و پٹ وپولی سرسہبی تیان معلومدار کننگا، اوپارے کہ طالب علم و استاد آتا کچ انا اعتبار اٹ اسلامیہ یونیورسٹی بہاولپور ملک انا بھلا جامعہ غاتیٹی حساب مریک۔ بہاولپور ، رحیم یار خان و بہاولنگر نا ضلع غاتون اوار اوار سویلی پنجاب و سندھ بلوچستان ناطالب علم آک ہم یونیورسٹی آن فائدہ ہرفنگ ءُ۔ بنجائی وزیر ءِ رحیم یار خان کیمپس نا ودفنگ، پوسکن آ بشخ آتا جوڑ کننگ و ایلو آسراتی تیان ہم معلومدار کرے۔ دا کیمپس ضلع رحیم یار خان نا ہزار آ طالب علم آتے گریجویٹ و پوسٹ گریجویٹ کہول انا تعلیمی آسراتی فراوان کننگ ءِ۔ بنجائی وزیر اسلامیہ یونیورسٹی بہاولپور نا چندی بشخ آتیٹی بھلا سرسہبی تا ستاءِ کرے۔ داوخت آ وائس چانسلر بنجائی وزیر ءِ اکیڈمیہ ، انڈسٹریل رابطہ غاتے ودفنگ کن کروک آ گام گیج آتیان ہم معلومدار کرے کہ بہاولپور ، رحیم یار خان نا چمبر آف کامرس تون ملک انا ایلو ایوان ہائے صنعت و واپار تون ہم رابطہ غاتے مون آ دننگ انگ ءِ تانکہ یونیورسٹی ٹی مروک آ پٹ وپولی سرجز آتیان صنعتی ادارہ غاک فائدہ ہرفر، و طالب علم آتے انٹرن شپ و پلیسمنٹ نا وارخواہی فراوان مننگ کے۔
