اسلام آباد۔ 30 جون (اے پی پی) بنجائی وزیر ڈٹ بندی ، شونداری و اصلاحات و خصوصی گام گیج پروفیسر احسن اقبال پارینے کہ عمران خان نا نابودی نا سوب آن ملکی زرگزران بھس مس و قومی ادارہ غاتے بھسکاری نا دنگ آ سلفنگا، وزیراعظم محمد شہباز شریف نا کماشی ٹی ملک ءِ غٹ ویل آتیان کشنگ کن اولیتی بنداو تیا گام گیج کننگ انگ ءِ۔ داخیال آتا درشانی ءِ او پنچ شنبے نادے آ میڈیا تون گپ وتران اٹی کرے۔ اوپارے کہ نیب کنے آ خلوک آ دوبہ و اسہ روپئی نا کرپشن اس ہم ثابت کننگ کتو، عمران خان نا دور اٹی ہم ہروار ہندا پارے کہ مالی بدعنوانی پک کننگے، عمران خان بہتان بازی نا سوب آن رسوا مننگ ءِ۔ احسن اقبال پارے کہ ساڑی حکومت ملک ءِ غٹ ویل آتیان کشنگ کن اولیتی بنداو تیا گام گیج کننگ ءِ۔ اوپارے کہ مسکوہی حکومت ایل این جی ہلتو ہراسوب آن مشکل آتا مون تروک ءِ، گیس انا ڈٹ وخت آ مفننگ نا سوب آن ملک اٹی لوڈشیڈنگ ءِ، دا لوڈشیڈنگ تدوک آ حکومت نا نالائخی ءِ۔ احسن اقبال پارے کہ تدوک آ حکومت ہراتم ہنا تو خزانہ خورک ئس، عمران خان نا نابودی نا سوب آن ملکی زرگزران بھس مس، نن ملک ءِ ڈیفالٹ مننگ آن بچفین، پی ٹی آئی تنقید کننگ آن مست قوم آن معافی خوائے۔
