لاہور۔ 30 جون (اے پی پی) لاہور ہائی کورٹ نا لارجر بینچ وزیراعلیٰ پنجاب نا سوغندی کن اسپیکر قومی اسمبلی ءِ پندار کننگ نا برخلاف اپیل آتے منظور کرسا وزیراعلیٰ حمزہ شبہاز نا گچین کاری ءِ کالعدم گوندسا دُوارہ گچین کاری نا پرمان کرے۔ عدالت گونداکہ سپریم کورٹ نا منحرف اسمبلی نا باسک آتا بابت فیصلہ وزیراعلیٰ پنجاب نا گچین کاری آ پورو وڑاٹ لاگو مریک، عدالتی فیصلہ غان پد حمزہ شہباز وزیراعلیٰ پنجاب سلتو۔ عدالت عالیہ نا لارجر بینچ فیصلہ چار اسٹ نا کچ اٹ بنفے، فاضل بینچ نا اسہ باسک جسٹس شاہد محمود سیٹھی فیصلہ تون مشروط اختلاف کرے۔ لاہور ہائی کورٹ نا جسٹس صداقت علی خان نا کماشی ٹی پنچ باسکی لارجر بنچ تحریک انصاف نا سبطین خان و اسپیکر چوہدری پرویز الٰہی تون اوار ایلوفتا اپیل آتیا سماعت کرے۔ پنچ شنبے نادے آ سماعت آ پنجاب حکومت نا وکیل ایڈووکیٹ جنرل پنجاب شہزاد شوکت، صدر مملکت نا کنڈآن احمد اویس، اسپیکر پرویز الٰہی نا کنڈآن بیرسٹر علی ظفر و امتیاز صدیقی و تحریک انصاف نا کنڈآن اظہر صدیق پیش مسر وخت اس کہ وزیراعلیٰ حمزہ شہباز نا کنڈآن منصور عثمان عدالت اٹ پیش مس۔ عدالت عالیہ نا پنچ باسکی لارجر بنچ اٹی جسٹس شاہد حمیل خان، جسٹس شہرام سرور چوہدری، جسٹس محمد ساجد محمود سیٹھی و جسٹس طارق سلیم شیخ اوار ءُ ۔
