اسلام آباد۔ 29 جون (اے پی پی) وزیراعظم شہباز شریف رش والا ہند آتیا کورونا دین آن بچنگ کن رکھی گام گیج آتیا عملدرآمد نا پارت کرسا پارینے کہ پورو ویکسی نیشن ، بوسٹرڈوز، ماسک، سینیٹائزر نا کاریم اٹ اتنگ و راجی فاصلہ نا خیال ءِ تخنگے۔ بھلا عئید آ پڑی ، برام و نجی محفل آتیٹی ماسک و سینیٹائزر نا کاریم اٹ اتنگ ءِ پک کننگے، کوویڈ۔ 19 آن تینا دوست آتا بچفنگ کن ننے غٹ ءِ زمواری نا درشانی ءِ کروئی مریک۔ چیف سیکرٹریک صوبہ غاتیٹی ایس او پی تیا عملدرآمد کرفر۔ او داخیال آتا درشانی ءِ چارشنبےنادے آ داڑے کورونا حالیت آتا بابت جاچ دیوان نا کماشی ءِ کرسا کرے۔ دیوان اٹی بنجائی وزیر عبدالقادر پٹیل، رانا ثناء اللہ ، شیری رحمان، چیئرمین این ڈی ایم اے سیکرٹری حوالکاری، سیکرٹری نیشنل ہیلتھ سروسز و تعلقدار بڑزکو آفیسر آک ساڑی ئسر۔ دیوان اٹی ہر چار آ صوبہ، آزاد کشمیر و گلگت بلتستان نا چیف سیکرٹریک ویڈیو لنک انا کمک اٹ بشخ ہلکر۔ دیوان ءِ پاکستان تون اوار جہانی کہول آ داوخت آ کوویڈ۔ 19 نا ساڑی حالیت آتیا سرجم معلومدار کننگا۔ دیوان ءِ پاننگاکہ مچ آ دنیا ٹی کوویڈ نا کیس آتا کچ اٹی جم وڑاٹ کمتی نا رجحان ءِ۔ تدوک آ اومیکرون نا ریسہ غان پد اومیکرون نا پوسکن آ ویریئنٹ ساڑی ہی ٹی پاکستان اٹی کوویڈ۔ 19 کیس آتیٹی ودکی نا سوب جوڑ مننگ ءِ ہرانا سوب آن 28 جون آ کورونا ٹیسٹ مثبت بننگ نا کچ 3 درسد آن گدرینگا۔ پوسکن آ ویر یئنٹ اٹ ہسپتال آتیٹی داخلہ نا کچ کوویڈ۔ 19 نا اولیکو غٹ ریسہ غاتیان کم ریکارڈ کننگانے۔ دیوان ءِ ملک اٹی ویکسی نیشن نا ساڑی حالیت آتیا ہم معلومدار کننگا۔ دیوان ءِ پاننگاکہ ملک انا داوخت آ 12 سال آن زیات 86 درسد آبادی پورو وڑاٹ ویکسی نیٹڈ ءِ وخت اس کہ 93 درسد ءِ کم از کم اسہ ڈوز اس لگانے۔ پاکستان اٹ داوخت آ ویکسی نیشن خلنگ نا کچ 2 لکھ ہڑدے ئی آن زیات ءِ۔ دیوان ءِ مستی پاننگاکہ سندھ اٹی داوخت اسکان مچ آآبادی ءِ پورو وڑاٹ ویکسی نیٹ کننگانے وخت اس کہ پنجاب و ایلو صوبہ غاتیٹی ہم ویکسی نیشن نا عمل ترندی اٹ پوروی نا کنڈآ ہِننگ ءِ۔ یوان ءِ مستی پاننگاکہ بارڈر آ پیشن نا ملک ہن و بر نا ہم چاروکی کن گام گیج و فاسٹ ٹریک ایپ ءِ صارف آتیکن آسان و گچین کننگ انگ ءِ۔ وزیراعظم تعلقدار کمامدارآتے نئے بیرہ کوویڈ۔ 19 ایس اوپی تیا عملدرآمد ءِ پک کننگ بلکن دا بابت السی آگاہی ءِ ودفنگ نا ہم پارت کرے۔ وزیراعظم پارے کہ غٹ ادارہ خاص وڑاٹ این سی او سی نا کوویڈ۔ 19 اٹی خذمت ستاکڑزک، فرنٹ لائن ہیلتھ ورکرز ، ڈاکٹر، منشاکار آتا کوویڈ۔ 19 اٹی خذمت آتیا خراج تحسین پیش کیوہ۔ اوپارے کہ کوویڈ۔ 19 آن بچنگ کن خذمت آتا سرتننگ اٹ شہید مروک آ ہیلتھ ورکرآک قوم انا رکھ اکن قربانی تسنو۔
