اسلام آباد۔ 29 جون (اے پی پی) وزیراعظم شہباز شریف پارینے کہ ملک ءِ پوسکن، شون ہلوک اسلامی آسودہی مملکت اس جوڑ کننگ کن تحریک پاکستان نا جوزہ اٹ تعمیر پاکستان نا تحریک اس بناکننگ نا گرج ءِ، ننا زیبا غا پاکستان 75 سال نا مننگ والا ءِ ، ملک ءِ زرگزرانی وڑٹ خودانحصار جوڑ کننگ کن سنبرینگوک اُن، میثاق معیشت نا مزل قومی ڈائیلاگ نا کمک اٹ دوئی کینہ۔ چارشنبے نادے آ اسہ ٹویٹ اسے ٹی وزیراعظم شہباز شریف پارے کہ برصغیر نا مسلمان تا ارمان ننا زیباغا پاکستان 75 سال نا مننگ والا ءِ ، آجوئی نا نعمت آ نن اللہ سبحانہ و تعالیٰ نا حضور سجدہ شکر کینہ۔ قائد اعظم و علامہ اقبال تون اوار مشاہیر پاکستان ءِ سلام ہرافتا بے مٹ سیاسی ، جمہوری و کانودی جہد اٹی اینو دنیا ٹی ننا درستی راستی ءِ۔ اوپارے کہ ڈائمنڈ جوبلی نا خوشی آ ’’عزم عالی شان ‘‘ شاد مرے پاکستان ‘‘ نا زیبا غا سرحال آن خصوصی ’’لوگو‘‘ اس جاری کننگ ستاکڑزک۔ مسخت آ ’’یخین‘‘ اونا دوئی کننگ کن ’نظم و ضبط‘ اتون پدریسہ جہد و سیوت نا جوزہ کارفرما مرے تو ہر نصب العین ءِ دوئی کننگ کینہ۔ اوپارے کہ اینو نن پاکستان ءِ زرگزرانی وڑاٹ خودانحصار جوڑ کننگ نا عزم ءِ کرینن۔ میثاق معیشت نا مزل نیشنل ڈائیلاگ نا کسر آ ہنسا دوئی کینہ تانکہ نن کس اسے نا دست نگر مفن، ننا چناک و ورناک تعلیم یافتہ و باشعور مریر انتئے کہ تعلیم اٹ ہی انفرادی و اجتماعی بدلی اتنگ کینہ۔ اوپارے کہ ورناک تحریک پاکستان نا جوزہ اٹ تعمیر پاکستان نا تحریک اس بناکیر تانکہ نن پاکستان ءِ پوسکن، شون ہلوک، زرگزرانی وڑاٹ خودانحصار ، اسلامی آسودہی مملکت اس جوڑ کین۔
