اسلام آباد۔ 29 جون (اے پی پی) صدر مملکت ڈاکٹر عارف علوی پارینے کہ قوم تا جوڑ کننگ اٹ ادارہ غاتا کڑد اہم ءِ، ٹیکنالوجی نا دوئی کننگ پوسکن آ علم اسکان سرمننگ نا ذریعہ ءِ، ساڑی آ دور اٹی علم انا دوئی کننگ نا خواست ترندی اٹ ودنگ ءِ۔ ایوان صدر نا پریس ونگ آن جاری بیان نا رداٹ صدر مملکت داخیال آتا درشانی ءِ چارشنبے نادے آ فیصل ایئر بیس کراچی ٹی 35 می ایئر وار کورس انا گریجویشن دود آن تران کرسا کرے۔ صدر مملکت پارے کہ دنیا نا ہر ویل سلابت اٹ طے مننگ کیک، عزم و جوزہ اٹ قومک جوڑ مریرہ ، افرادی قوت قومی شونداری نا سیڑھی ءِ۔ اوپارے کہ جمہوریت نا علمبردار قومک باہوٹ آتا باندات اٹی غیر سنجیدہ ءُ، تعصب آن ایڑترمرسا شونداری نا مزل آتے طے کننگ مریک، مسلم امہ اخلاقی قدر آ یخین تخک۔ صدر ڈاکٹر عارف علوی داہیت آ زور شاغا کہ ننے بے رنگ و نسل و امتیاز نا مظلوم تا مخ تفی ءِ برجاتخوئی مریک، شونداری نا دوئی کننگ اٹ انسانیت نا پلو بایدے مقدم مرے۔ اوپارے کہ قومک حادثاتی وڑاٹ شون ہلپسہ داڑکن مریس جہد المی ءِ، مصنوعی ذہانت کون آ علم اتون ہم گرنچ مننگ وخت انا گرج ءِ۔ دود اٹی صدر مملکت گریجویٹ مروک آ آفیسر آتیٹی سند بشخا۔گریجویٹ مروک آتیٹی 70 آفیسر و سنگت ملک آتا 18 آفیسر اوار ءُ ہرافتے ٹی سعودی عرب، بنگلہ دیش، سری لنکا، انڈونیشیا ، ملائیشیا ، شام و یمن نا ہم آفیسر آک اوار ءُ۔
