بنجائی وزیر حوالکاری و شینکاری مریم اورنگزیب اے پی پی ملازم آتا برانز آ سرمس، یک جہتی نا درشانی نا وڑاٹ سڑک آ توس، وزیر حوالکاری نا باور کرفنگ آ مچی کروک آک برانز ءِ چٹفیر

اسلام آباد۔ 29 جون (اے پی پی) بنجائی وزیر حوالکاری و شینکاری مریم اورنگزیب سے شنبے و چارشنبے نا نیامی نن آ قومی خبررساں ادارہ (اے پی پی) نا ملازم آتا شاہراہ دستور آ برجابرانزی مچی ٹی سرمس۔ اوملازم آتا خواست آتے ایسر کننگ نا باور کرفے اوکان پد مچی کروک آک تینا برانز ءِ چٹفیر۔ بنجائی وزیر حوالکاری و شینکاری مریم اورنگزیب چارشنبے نا نن شاہراہ دستور آ ایسوسی ایٹڈ پریس آف پاکستان (اے پی پی) نا برانز کروک آتون اوڑدہی کن سرمس۔ ایم ڈی اے پی پی اخترمنیر، پرنسپل انفارمیشن آفیسر (پی آئی او) مبشر حسن ہم اوڑتون اوار ئسر۔ بنجائی وزیر حوالکاری یکجہتی نا درشانی نا وڑاٹ مچی کروک آتون سڑک آ توس۔ اوپارے کہ صحافی تتون اونا تعلق سیاسی یا حکومتی نمائندہ نا وڑاٹ اف۔ ای اے پی پی نا ملازم آتا ویل آتیان پورو وڑاٹ معلومدار اُٹ ولے دا ویل بیرہ اے پی پی نا اف۔ اوپارے کہ مچ آ دے وزارت حوالکاری نا بڑزکو کمامدار آک وزارت خزانہ تون رابطہ ٹی ئسر۔ "ڈسپیریٹی الاونس ” و ریگولر پے اسکیل ” غٹ کارپوریشن آتا ویل ءِ۔ وزارت خزانہ نا کمامدار آتے پارینن کہ دا ویل انا زوت ایسر اس کشر۔ دارداٹ اسہ کمیٹی اس ٹہیفنگانے ہرا اینو (چارشنبے) نادے آ داباندات نا جاچ ءِ ہلیک۔ اواے پی پی ایمپلائز یونین نا نمائندہ غاتے پارے کہ او ہم کمیٹی نا دیوان اٹ بشخ ہلیر۔ بنجائی وزیر حوالکاری مریم اورنگزیب باور کرفے کہ اے پی پی ملازم آتا ترقی کن "ڈی پی سی” کرفنگ نا پارت جاری کننگک۔ اے پی پی ملازم آک وزیر حوالکاری و شینکاری مریم اورنگزیب نا بننگ، یکجہتی نا درشانی و ویل آتا ایسری نا باور کرفنگ آ منت واری ءِ ہرفیر و برانز ءِ چٹفیر۔