اقوام متحدہ۔ 29 جون (اے پی پی) پاکستان سلامتی کونسل آ زور شاغانے کہ او جموں و کشمیر کون آ مریس مدتی جھیڑہ غاتا بابت تینا قرارداد آتیا عملدرآمد ءِ پک کننگ کن سنجیدگی اٹ سجفے و ودوک آ چیلنج آتون مون تننگ کن 15 باسکی سلامتی کونسل ءِ پین شفاف، جوابدہ ، جوان و جمہوری بایدے جوڑ کننگے۔ اقوا م متحدہ ٹی پاکستان نا قائم مقام آخبتی نمائندہ عامر خان تدوک آ دے سلامتی کونسل نا کاریم کننگ نا وڑوڈول آ شرہ ٹی پارے کہ سلامتی کونسل نا ساکھ اکن اونا قرارداد آتیا ’’سلیکٹیو‘‘ عملدرآمد و عدم نفاذ آن زیات نسخان دہ ہچ اس اف۔ اوپارے کہ سلامتی کونسل نا قرارداد آتیا عملدرآمد اٹی بے سہبی اونا ساکھ ءِ نسخان ایتک و اقوام متحدہ نا چارٹر نا اصول و جھیڑہ غاتا پیسفک ایسری کن ریاست و الس نا عزم ءِ چٹفک۔ اوسلامتی کونسل نا جوان اصلاحات آ جنرل اسمبلی نابین الحکومتی مذاکرات (آئی جی این) نا عمل نا کمک اٹ زوت امنائی سلاہ نا اومیت ظاہر کرے و داوخت آ اونا کاریم کننگ نا وڑوڈول آتیٹی گچینی اتنگ آ زور شاغا۔ اوپارے کہ ساڑی آ سال تیٹی کونسل نا کاریم کننگ نا وڑوڈول و عمل اسہ ہندن ءُ کنڈ اسے آ ہِننگ ہرا جہانی برادری و اقوام متحدہ نا جنرل رکنیت نا اومیت آتیا پورو سلپک۔ اواقوام متحدہ نا گیشتر رکنیت اتون اونا ودوک آ مصروفیت نا گرج آ زور شاغا و پارے کہ بنددرگہ غاتیٹی کم آن کم بایدے دیوان مرے انتئے کہ ننا غٹ انا جہانی امن وسلامتی ءِ برقرار تخنگ اٹ بریبر نا بشخ ءِ۔ اواست ہسونی نا درشانی ءِ کرسا پارے کہ کونسل نا کاریم نا اوپن نیچر خاص وڑاٹ سرد جنگ انا چٹنگ آن پد چٹانے۔ اوپارے کہ فیصلہ سازی نا عمل اٹ کونسل نا شرہ غاتیٹی روا بشخ تخوک آ ریاست آتا بامعنی بشخ ہلنگ ءِ بایدے پک کننگے۔ اوپارے کہ سلامتی کونسل نا اشرافیہ نوعیت آ است جم مفننگ و اونا ویٹو نا کاریم اٹ اتنگ آن مایوسی ودنگ ءِ۔ پاکستانی سفیر عامر خان پارے کہ سلامتی کونسل نا جنرل اسمبلی و اقوام متحدہ نا اقتصادی و راجی کونسل اتون تعلقداری تے ہم اقوام متحدہ نا چارٹر نا روح انا رداٹ بایدے اتنگے۔
