اسلام آباد۔ 29 جون (اے پی پی) وزیر مملکت خزانہ عائشہ غوث پاشا پارینے کہ مالی بل 2022ء ٹی گڑاس ترمیم کننگانے ہرا آئی ایم ایف تون معاہدہ غاتا رداٹ ءُ، آئی ایم ایف تون دا معاہدہ ءِ سیاسی جماعت اس آخا بلکن حکومت پاکستان کرینے، داڑآ عمل کپننگ آن حکومت پاکستان نا ساکھ زہمی مریک، بجٹ اٹی کم کٹیا والا تپہ ءِ خراج اٹ ریلیف تننگانے۔ چارشنبے نادے آ قومی اسمبلی ٹی مالی بل 2022ء آ سجفنگ نا تحریک آ شرہ ٹی بشخ ہلسا مولانا عبدالاکبر چترالی پارے کہ داوخت آ ہرا فنانس بل ءِ پیش کننگانے اوٹی 10 جون آ پیش کروک بجٹ اٹ 50 درسد ترمیم کننگانے ہنداخاطرآن بجٹ آ شرہ نا ہچ ءُ فائدہ اس مفک۔ 10 جون آ ہرا بجٹ ءِ پیش کننگانے اوٹی پیٹرولیم مصنوعات آ 30 درسد ڈویلپمنٹ لیوی خلنگا ہرا بجٹ اٹی 50 روپئی فی لیٹر مقرر کننگ نا سلاہ ءِ نن دانا مخالفت ءِ کینہ و دادے مسترد کینہ۔ داڑآن الس آ ودکی بھاریم شاغنگانے۔ اوپارے کہ بل سودی نظام ءِ رکھ فراوان کننگ ءِ ہراآئین نا برخلاف ءِ۔ تحریک انصاف نا باسک وجیہہ قمر پارے کہ شق 2 کسٹمز ایکٹ سب سیکشن 5 پیراگراف اے ٹی ترمیم سلاہ کرینے۔ کسٹمز ایکٹ اٹ اسہ ترمیم اسے ٹی سلاہ کننگانے کہ صوبائی پرویژن نا زمواری کن مد شش تُو آن کم کرسا اسہ تُو کننگے۔ پیکا و ایلو کانود اٹی ہراسزا تے تجویز کننگانے اوٹی توازن اتنگ المی ءِ۔
