اسلام آباد۔ 29 جون (اے پی پی) بنجائی وزیر حوالکاری و شینکاری مریم اورنگزیب پارینے کہ قیام پاکستان نا 75 سال پورو مننگ آ ڈائمنڈ جوبلی نا خوشی و مبارک وخت آ”عزم عالی شان” شاد مرے پاکستان” نا سرحال آن خصوصی “لوگو” اس جاری کرینے ، دا پاکستان تون مہرومریبت و داعزم انا پوسکنی ءِ کہ ننا نرزور و عظیم بزرگ و شہید آک ہراعزم اٹ پاکستان ءِ جوڑکریسر، ہندا عزم اتون زرگزرانی وڑاٹ اودے سوگو و خودانحصار ، آسودہی مملکت و دفاعی لحاظ اٹ ناقابل تسخیر جوڑ کینہ۔ چارشنبے نادے آ تینا ٹویٹ اٹی بنجائی وزیر حوالکاری مریم اورنگزیب پارے کہ دانا مسخت ءِ کہ قیام پاکستان نا حقی مسخت دوئی مرے و الس نا زند اٹی او آسانی برے ہرانا تغ ءِ برصغیر نا مسلمانک خناسر۔ زرگزرانی خودانحصاری نا وژن اٹ پاکستان نا ورناک حقی وڑاٹ قوم انا جوڑ کروک مریرہ۔ اوپارے کہ تعلیم، روزگار، کاروبار و زند انا غٹ بشخ آتیٹی ہراول دستہ جوڑ مریک، نن تینا ورناتے فیصلہ ساز جوڑ کینہ۔ اوپارے کہ قیام پاکستان آنبار اسہ اسلامی آسودہی، شون ہلوک و زرگزرانی وڑاٹ وتواجہ پاکستان نا تغ ہم سچ مریک۔
