اسلام آباد۔ 28 جون (اے پی پی) وزیراعظم شہباز شریف پارینے کہ خو د انحصاری ہی قوم انا سیاسی و زرگزرانی آجوئی نا ضمانت ءِ ، مسکوہی حکومت بجلی نا پیدوار نا ڈٹ آتیٹی تاخیر و گیس انا اڑزآن و مریس مدتی معاہدہ کپرسا ملک ءِ نسخان تس، سپر ٹیکس انا پیسہ غاتے زیان مننگ کن الیپنہ۔ ریئل اسٹیٹ ملک انا بشخ ءِ ولے سٹے بازی بایدے مف، کشت وکشار نا بشخ انا شونداری کن بزغرآتے آسراتی تننگک، خیسن آ فیتہ، پرمٹ، این او سی، دفتر و سفارش نا چکر داسہ بایدے چٹے، اوغانستان آن کولا نا درآمد آن سالانہ اِرا ارب ڈالر نا بچت مریک، آئی ایم ایف آن زوت 2 ارب ڈالر ملک۔ اوداخیال آتا درشانی ءِ سے شنبے نادے آ داڑے ’’ٹرن اراؤنڈ پاکستان‘‘ کانفرنس آن تران کرسا کرے۔ کانفرنس اٹی بنجائی وزیرآک، پارلیمنٹ نا باسک آک، زرگزرانی چاہندار آک و کاروباری شخصیت آک بشخ ہلکر۔ وزیراعظم پارے کہ خو دانحصاری اسل مزل ءِ، مخلوط حکومت اٹ ہرچار آ صوبہ غاتا نمائندگی ءِ و سلابت اٹ فیصلہ کننگے تو اودے سوگوی ملک۔ ملک انا زرگزرانی حالیت آتے گچین کننگ نا چیلنج ءِ غٹ امنا کرینو، دازمواری ءِ نن پورو کینہ، آئی ایم ایف آن زوت 2 ارب ڈالر ملک، خودانحصاری قوم اسے نا سیاسی و زرگزرانی آجوئی نا ضمانت مریک داکان بیدس اسہ قوم اس ہم آجو فیصلہ کننگ کپک۔ بنگلہ دیش آئی ایم ایف، جہانی بینک و پین مالیاتی ادارہ غاتا کمک آن بیدس 6 ارب ڈالر نا بنداوی پنجر نا اسہ بھلو ڈٹ اس جوڑ کرینے۔ 75 سال اٹی پاکستان بھاز پدی سلیس، پاکستان اٹی وسیلہ و باصلاحیت بندغ آتا کمتی اف، واپار،، زرگزران، سیاست، سفارتکاری و صحافت غٹ بشخ آتیٹی قابل بندغ آک ساڑی ءُ، اللہ تعالیٰ ننے بے شمار نعمت تسنے، ریکوڈک اٹ ارب ڈالر نا خزانہ دفن ءِ ولے داسکان نن داڑآن اسہ ٹکا اس ہم کٹیا کتنون الٹا مقدمہ غاتیا ارب آ روپئی زیان کننگا۔ وزیراعظم پارے کہ پاکستان اسہ نیوکلیئر واک اسے و دا ایٹمی لائخی ننا دفاع کن ءِ، کس اسے نا برخلاف جارحیت کن آخا و دالائخی ننا دفاع ءِ سوگو کرینے۔ ملک اینو وام تا بھاریم اٹ ڈبنگوک ءِ، شونداری و شونہالی نا ہند دوئی کپننگ آ است ہسونی ءِ۔ مستین اٹ سہی فیصلہ کننگتو ہرانا ملک ءِ نسخان مس، حویلی بہادر شاہ ٹو 1250 میگاواٹ نا بجلی نا پیدوار نا ڈٹ ءِ۔ دا اِرا دونیم سال مہالو پورو مروئی ئسک ولے بدبختی اٹ پوسکن آ ٹیکنالوجی نا دا ڈٹ اینو اسکان پیدوار تننگ کتو، داتاخیر نا سوب آن نئے بیرہ اونا خڑچ آک ودار بلکن بجلی نا پیدوار بناکپننگ آن ملک ءِ بھلو نسخان اس ہرفوئی تمانے۔ وزیراعظم نواز شریف نا دور اٹی امریکی نا کمپنی جی ای مسہ پین ڈٹ خلک و اوفتیان پیدوار بناکریسس ولے اینو گیس مفننگ نا سوب آن پورو گنجائشت نا رداٹ بجلی ودی کننگ کپنہ۔ دنیا ٹی ہرا تنکی بس اونا سوب آن توانائی نا کاختی ودی مسنے، مسکوہی حکومت گیس انا اڑزآن و مریس مدتی معاہدہ کتو، نواز شریف دور اٹی گیس انا درآمد نا 13 ڈالر آ معاہدہ مسوسس اوڑآ بھاز تنقید کننگا، میڈیا ٹی ہم دادے شیف بڑز کننگا ولے ہراتم سپاٹ مارکیٹ مسہ ڈالر آ بس تو نئے تو سپاٹ آ ایل این جی خواہفنگا و نئے مریس مدتی معاہدہ کننگا، داسہ گیس دوئی ہی اف۔ وزیراعظم پارے کہ دنیا ٹی کولانا نہاد ودنگ نا سوب آن جنکوز آن بجلی نا پیدوار بناکرفوئی تما ہرا 60روپئی فی یونٹ آ بجلی جوڑ کیک، اگہ 1250 میگاواٹ بجلی نا ننا ڈٹ پورو مسکہ تو ولدا دا کبین بجلی جوڑ کروئی تمتوکہ۔ داسہ جولائی آن اوغانستان آن کولانا درآمد بناکیک ہراڑآن اسہ سال اٹی اِرا ارب ڈالر نا بچت مریک و کولانا درآمد ہم روپئی ٹی مریک۔ وزیراعظم پارے کہ گوادر نا او ارٹ میکو دورہ ءِ کرینے ہموڑے کمکی زر آن اسہ ہسپتال اس تفنگ انگ ءِ اونا داتم اسکان بیرہ 38 درسد آ کاریم مسنے۔ ہندا وڑ گوادر انٹرنیشنل بالی پٹ ہم تاخیر نا گواچی ءِ ، گوادر ءِ پولان ایران آن بجلی نا فراوانی کن ایرانی حکومت سیم اسکان ٹرانسمیشن لائن و گریڈ اسٹیشن اس جوڑ کرینے، پنچ سال گدرینگا پاکستان اٹ 26 کلومیٹر مریس ٹرانسمیشن لائن تالان کننگ متو، داتاخیر آ بلوچستان نا الس نا برانز برحق ءِ، گوادر اٹی کنوئی آ دیر انا آسراتی ہم فراوان کننگتنے ولے ساڑی حکومت نا گام گیج آتیٹی ستمبر اسکان پیپ لین بدل کرسا دیر انا فراوانی ءِ پک کننگک۔ وزیراعظم پارے کہ منہ ہفتہ مست کنوئی آ تیل انا کاختی مون تروک ئسک، انڈونیشیا نا صدر تون کنوئی آ تیل انا درآمد کن فون آ ہیت کرین، سنگت ملک آتیان ہم اوڑتون رابطہ کرفین وخت اس کہ بنجائی وزیر صنعت تینا جند انا خڑچ آ انڈونیشیا غا ہنا و کنوئی آ تیل انا درآمد کن فون آ ہیت کرے۔
