اسلام آباد۔ 28 جون (اے پی پی) بنجائی وزیر ڈٹ بندی، شونداری، اصلاحات و خصوصی گام گیج احسن اقبال پارینے کہ پاکستان ءِ کیہی چیلنج مون تروک ءِ، مون تننگ کن اسیجائی لائحہ عمل اس تینا کروئی مریک، خوانہ بروک آ چین تے پرامن، شونہال و شون ہلوک پاکستان اس ایتن کان۔ ٹرن اراؤنڈ کانفرنس نا مسخت ہندن ءُ آئیڈیا مون آاتنگ ءِ ہراڑآن پاکستان ءِ شونداری نا کنڈآ دننگ مرے۔ داخیال آتا درشانی او سے شنبے نادے آ ٹرن اراؤنڈ کانفرنس آن تران کرسا کرے۔ بنجائی وزیر پارے کہ دا غٹ ءِ است انا حب اٹ بخیر اٹ پاوہ ہرا ملک انا چندی بشخ و مچ آدنیا غان کانفرنس اٹی بشخ ہلنگ کن بسنو، او ملک ءِ ٹرن راؤنڈ ہم کیرہ و اودے شونداری نا کسر آ شاغرہ۔ اوپارے کہ مارشل لا غان پد شونداری نا وژن ءِ ردی نا ٹوکری ٹی شاغنگا، وژن 2025 نا مسخت ملک ءِ دنیا نا 25 بھلا زرگزران تیٹی اوار کننگ ئس، 2018ٹی حکومت نا بدلی اتون وژن ہم بدل مس، 2018 ء ٹی شونداری بجٹ 1000 نا خڑک ئس، ہنداخہ ہی بجٹ دفاع نا شونداری نا ئس ولے است ہسونی اٹ پاننگ خواوہ کہ مسہ نیم سال آن پد ننا شونداری بجٹ 550 ارب روپئی آ بس و آخیریکو کوارٹر اٹی ریلیز زیرو کننگا۔ اوپارے کہ وزیراعظم صاحب نی ملک و زرگزران ءِ بچفنگ نا کسر اس پٹاس، ملک انا شونداری کن ہرا کسر ءِ ہلکونس اونا رداٹ ملک ءِ دُوارہ شونداری نا کسر آ شاغوئی ءِ، روس یوکرین تنکی نا سوب آن نہاد آتیٹی بے پناہ ودکی مس، ارٹ میکو مستین نا حکومت نا کنڈآن وخت آ فیصلہ کپننگ نا سوب آن نن پدی ہنان۔ اوپارے کہ 75 سال اٹی ملک ءِ ہموجاگہ غا دننگ کتور ہرانگیا دروئی ئسک، پالیسی تا چرجوئی مفننگ نا سوب آن شونداری نا ہدف آتے دوئی کننگ کتون، ننا زمواری ءِ کہ بروک آ چین ءِ گچین ءُ آخبت اس ترسا کان، شونداری کن اصلاحات کروئی مریک، صنعت آتے مون آ دننگ کن ویلیو ایڈیشن آ چکار کروئی مریک ، ہندن ءُ مصنوعات تیار کروئی مریک کہ میڈان پاکستان ءِ مون آ دننگے، کشت وکشار ءِ شون تروئی مریک، کنوئی آ تیل، بورہ و خولم اٹی خودکفیل مروئی مریک۔ اوپارے کہ ننا زرگزرانی ٹک آک نیزگار ملک آتیانبار ءُ، پدسلوک علاہق غاتے شونداری تروئی مریک، 20 پسماندہ ضلع غاتا شونداری کن خصوصی پروگرام بناکننگ انگ ءِ ، ننے بشخنگ، بے چیٹی آن پیش تموئی مریک، و اواری اٹ شونداری نا کسر ءِ تینا کروئی مریک، حکومت تون زیات وسیلہ اف، نجی بشخ ءِ شونداری نا سفر اٹ اوار کروئی مریک۔ اوپارے کہ ’’ٹرن اراؤنڈ پاکستان ‘‘ شونداری و مثبت سوچ انا پن ءِ۔ کانفرنس نا مسخت ہندن ءُ آئیڈیا مون آ اتوئی ءِ ہراڑآن پاکستان ءِ شونداری نا کسر آ دننگ مرے۔ نن خوانہ پاکستان کشت وکشار نا بشخ اٹی شون ہلے۔ اوپارے کہ تدوک آ دور حکومت اٹی نن وژن 2025 ءِ لانچ کرین۔ وژن 2025 نا مسخت ملک ءِ شون ہلوک ملک آتا صف اٹ اتوئی ئسک۔ نن پاکستان ءِ دُوارہ شونداری نا کسر آ اتینہ۔ اوپارے کہ ننا مسخت مون تروک چیلنج آتون مون تننگ و بروک آ چین ءِ شون ہلوک ملک اس تننگ ءِ۔ ننا ورناتیٹی بے پناہ لائخی ارے۔ ننے ورناتے مون آ ہِننگ نا وارخواہی اس فراوان کروئی مریک۔ اوپارے کہ وزیراعظم نا پارت آ ملک اٹی سیل و سوات نا مون آ دننگ کن گام گیج کننگ اُن۔ ملکی شونداری کن یکجا مرسا کاریم کننگ نا گرج ءِ۔
