اسلام آباد۔ 27 جون (اے پی پی) وزیراعظم شہباز شریف اسلام آباد جیل کمپلیکس نا ڈٹ اٹی سال تیان تاخیر نا نوٹس ءِ ہلسا بروک آ مالی سال اٹی جیل انا تفنگ ءِ پورو کننگ نا پارت کرینے و ڈٹ انا جاچ ءِ ہلنگ کن 6 باسکی کمیٹی اس جوڑ کرینے۔ دوشنبے نادے آ وزیراعظم آفس نا میڈیا ونگ آن جاری بیان نا رداٹ وزیرداخلہ رانا ثناء اللہ خان ءِ کمیٹی نا سروک پن کننگانے، وزیراعظم نا سیکرٹری ڈاکٹر توقیر شاہ دا بابت حکمنامہ جاری کرینے۔ کمیٹی نا باسک آتیٹی داخلہ، ہاؤسنگ ، ڈٹ بندی نا وزارت آتا سیکرٹری، چیف کمشنر اسلام آباد و چیئرمین سی ڈی اے اوار ءُ۔ وزیراعظم باندات آ کمیٹی آن اسہ ہفتہ ٹی رپورٹ بٹنگسا اسلام آباد ماڈل جیل کمپلیکس نا سال تیان پدسلوک ڈٹ ءِ ہلہلہ ئی بنداوتیا پورو کننگ نا پارت کرینے۔ پوسکن آ جہانی آب و آسراتی تا حامل اسلام آباد زندان نا تفنگ فنڈ مفننگ نا سوب آن پورو مننگ کتو۔ وزیراعظم پارت کرے کہ بروک آ مالی سال اٹی دا ڈٹ ءِ پورو کننگے۔ یات سلے کہ اسلام آباد جیل کمپلیکس ءِ دنیا نا پوسکن آ جیل آتا وڑآ تفنگ انگ ءِ۔ اسلام آباد نا تینا جیل مفننگ نا سوب آن بندی تے تدوک آ 6 دہائی آن اڈیالہ جیل اٹ تخنگ انگ ءِ۔ اسلام آباد اٹی موٹروے نا خڑک سیکٹر ایچ 16 ٹی 90 ایکڑ آ تالان دا پوسکن آ زندان ءِ تفنگ انگ ءِ۔ اِرا مزلہ بیرکوں والا دازندان اٹی 2 ہزار بندی تے تخنگک۔ اسکول، مسیت، ٹریننگ سینٹر، گوازی تا میدان، آئی سی ٹی نا عدالت آک ہم دا زندان کمپلیکس نا بشخ ءُ۔ زندان کمامدارآتا تربیت نا مرکز ہم ڈٹ انا بشخ ءِ۔
