اسلام آباد۔ 27 جون (اے پی پی) صدر مملکت ڈاکٹرعارف علوی اسہ نجی انشورنس کمپنی اسے تینا صارف ءِ 21 لکھ روپئی آتشزدگی انشورنس کلیم ادا کننگ نا پارت و بدانتظامی نا مرتکب گوندسا بنجائی انشورنس محتسب نا فیصلہ نا برخلاف ایشیا انشورنس کمپنی نا درخواست ءِ مسترد کرینے۔ ایوان صدر نا پریس ونگ آن دوشنبے نادے آ جاری بیان نا رداٹ صدر مملکت پارے کہ کمپنی خاخر لگنگ نا وخت آ آتشزدگی انشورنس پالیسی نا نافذ العمل مننگ ءِ امنا کرے وخت اس کہ کمپنی آتشزدگی آن مروک آ نسخان نا تعین ءِ کننگ کن سروے رپورٹ نا نتیجہ غاتے ہم امنا کرینے۔ صدر ڈاکٹر عارف علوی پارے کہ شارٹ سرکٹ نا سوب آن لگوک آ خاخر آن کم و ود 21 لکھ روپئی نا نسخان مس ولے صارف ءِ روا زر تننگتو۔ سرجم حوال آتا رداٹ انشورنس کمپنی لاہور اٹی طحہٰ محد انٹرپرائزز ءِ خاخر لگنگ نا وخت آ انشورنس پالیسی نا نافذ مفننگ نا بہانہ جوڑ کرسا زرتس آن انکار کرے ہراڑآ غاوتروک انصاف نا دوئی کننگ کن بنجائی انشورنس محتسب تون اپیل دائرکرے۔ محتسب غاوتروک آ نا دعویٰ ءِ امنا کرے و کمپنی ءِ 30 دے اٹی کلیم ادا کننگ ناپارت کرے ولے انشورنس کمپنی فیصلہ غا عمل کننگ نا جاگہ غا صدر مملکت ءِ درخواست تس ہرادے صدر مملکت مسترد کرینے۔ صدر مملکت نجی انشورنس کمپنی ءِ تینا صارف ءِ آتشزدگی انشورنس کلیم ادا کننگ نا پارت کرینے۔
