بنجائی وزیر سائنس و ٹیکنالوجی آغا حسن بلوچ تون قزاخستان نا سفیر یرژان کسٹافین نا اوڑدہی

اسلام آباد۔ 27 جون (اے پی پی) بنجائی وزیر سائنس و ٹیکنالوجی آغاحسن بلوچ پاکستان و قزاخستان نا نیام اٹ چندی بشخ آتیٹی ودوک آ کمکاری آ است جمی نا درشانی ءِ کرسا پارے کہ گوادر زوت واپاری ہند اس مریک و گوادر بندرگاہ نا شونداری نا کمک اٹ لینڈ لاک ریپبلکن دنیا اسکان رسینگ دوئی کننگ کیک ہراڑآن مچ آ ڈیہہ ٹی راجی و اقتصادی گچینی بریک۔ داخیال آتا درشانی ءِ او قزاخستان نا سفیر یرژان کسٹافین تون اوڑدہی ٹی کرے ہرا وزارت سائنس وٹیکنالوجی ٹی اوڑتون اوڑدہی کرے۔ وزارت سائنس و ٹیکنالوجی نا کنڈآن دوشنبے نادے آ جاری بیان نا رداٹ بنجائی وزیر قزاخستان نا سفیر ءِ بخیر کرسا پارے کہ پاکستان قزاخستان تون تعلقداری تے بھاز اہمیت ایتک و تین پہ تینی است خواہی نا چندی بشخ آتیٹی ہڑتوم آ کنڈآتا کمکاری ءِ پین ودفنگ خواہک۔ اوہڑتوم آ ملک آتا نیام اٹ کمکاری کن ساڑی وارخواہی تے مون آ تخا۔ بنجائی وزیر قزاخستان تون وسیع بنداو و کڑمب تعلقداری تا است خواہی نا درشانی ءِ کرے۔ آغاحسن بلوچ بلوچستان نا معدنی وسیلہ غاتیان شپ مننگ و ہموڑے معدنی بشخ ءِ شونداری تننگ نا حکمت عملی نا ہم ذکر ءِ کرے۔ بنجائی وزیر سائنس و ٹیکنالوجی و قزاخستان نا سفیر سائنس و ٹیکنالوجی نا بشخ اٹی کمکاری کن اسیجائی پٹ وپولی کونسل کن مفاہمت نا یات داشت آ دستخط کننگ نا عمل آ گپ وتران کرے۔ ہراڑآ بروک آ منہ تُو اٹی دستخط مننگ نا گمان ءِ۔ پاکستان و قزاخستان نا نیام اٹ ودوک آ کمکاری آ است جمی نا درشانی ءِ کرسا بنجائی وزیر پارے کہ نن ورناچین نا نیام اٹ کمکاری ءِ مون آ دننگ نا است بڈی ءِ کینہ و سائنس و ٹیکنالوجی ہی آخبت ءِ۔ دا چرجوئی ٹی الفارابی یونیورسٹی قزاخستان و نسٹ انا نیام اٹ اسہ مفاہمتی یات داشت نا باندات ہم پیپ لین اٹی ءِ۔ آغاحسن بلوچ پارے کہ مفاہمتی یات داشت آن پد آخبت نا عمل درآمد نا ڈٹ ہم پیش کننگک تانکہ ہڑتوم آ ادارہ غاک مفاہمتی یات داشت اٹ سلاہ کروک حکمت عملی آ کاریم کننگ کیر۔ قزاخستان نا سفیر بنجائی وزیر ءِ شاعر مشرق ڈاکٹر محمد اقبال نا فلسفہ و خذمت آتیا قازقستان اٹی اڈ ہلوک آ اسہ جہانی سیمینار نا بارواٹ ہم معلومدار کرے۔