کورونا دین اتون مون تننگ کن جہانی ادارہ جان جوڑی نا وخت آ کمکاری بے مٹ ئس، پاکستان اٹی دا دینی مرض ءِ گچین وڑاٹ کنٹرول کننگا، چیئرمین سینیٹ

اسلام آباد۔ 27 جون (اے پی پی) چیئرمین سینیٹ محمد صادق سنجرانی پارینے کہ کورونا دین اتون مون تننگ کن جہانی ادارہ جان جوڑی نا وخت آ کمکاری بے مٹ ئس، پاکستان دا ڈیہہ نا اسٹ انگا ملک ءِ ہراڑے دا دینی مرض ءِ گچین وڑاٹ کنٹرول کننگا۔ سیکرٹریٹ آن جاری بیان نا رداٹ داخیال آتا درشانی ءِ او پاکستان اٹ جہانی ادارہ جان جوڑی نا نمائندہ ڈاکٹر پلیتھا گونراتھنا تون گپ وتران کرسا کرے ہرا دوشنبےنادے آ داڑے اوڑتون اوڑدہی کرے۔ اوڑدہی ٹی پاکستان اٹی کورونا دین انا حالیت آتیا گپ وتران کننگا۔ ڈاکٹر پلیتھا چیئرمین سینیٹ ءِ ڈبلیو ایچ او نا پاکستان اٹ ڈٹ آتا بابت معلومدار کرے و پارے کہ پاکستان دا ڈیہہ نا اسٹ انگا ملک ءِ ہراڑے دا دینی مرض ءِ گچین وڑاٹ کنٹرول کننگا۔ داوخت آ چیئرمین سینیٹ پارے کہ کورونا دین اتون مون تننگ کن ڈبلیو ایچ او نا وخت آ کمکاری بے مٹ ئسک۔ اومیت ءِ ڈبلیو ایچ او پاکستان کن کمکاری نا فراوانی ءِ برجاتخک۔ اوپارے کہ پاکستانی الس ءِ جان جوڑی نا گچین آسراتی فراوان کننگ اٹ جہانی ادارہ جان جوڑی مدام کمک کرینے۔ انسداد پولیو نا گام گیج آتے پین ترند کننگ نا گرج ءِ۔ الس ءِ جان جوڑی نا آسراتی فراوان کننگ حکومت نا اولیت ءِ۔ چیئرمین سینیٹ کورونا دین (کوویڈ۔ 19) ویکسین اسکان رسینگ کن گچین کمکاری فراوان کننگ آ ڈاکٹر پلیتھا نا منت واری ءِ ہرفے۔