پنچ دے ئی پولیو تور مہم نا بناء، مہم اٹی 12.6 ملین چناتے رکھی پڑی کنفنگ نا ہدف ءِ تخنگانے، عبدالقادر پٹیل

اسلام آباد۔ 27 جون (اے پی پی) بنجائی وزیر قومی جان جوڑی عبدالقادر پٹیل پارینے کہ پولیو نا چٹفنگ اسکان آرام اٹ تولپنہ۔ دوشنبے نادے آ بناکروک آ مہم اٹی 12.6 ملین چناتے رکھی پڑی کنفنگ نا ہدف ءِ تخنگانے۔ دوشنبے نادے آ وزارت جان جوڑی آن جاری بیان نا رداٹ بنجائی وزیر پارے کہ پولیو تور مہم اٹی 12.6 ملین چناتے رکھی پڑی کنفنگ نا ہدف ءِ تخنگانے، 25 ضلع پولیو کن حساس گوندنگانو، حساس ضلع غاتیٹی چناتے پولیو نا پڑی کنفنگک۔ اوپارے کہ ایلو ضلع غاتیٹی مخصوص یونین کونسل اٹ مہم مریک۔ مہم اٹی اسہ لکھ آن زیات تربیت یافتہ فرنٹ لائن ورکراُرااُراغا ہنسا چناتے  رکھی پڑی کنفرہ۔ عبدالقادر پٹیل پارے کہ حکومت پولیو نا چٹفنگ کن گچین و مربوط حکمت اس ترتیب تسنے۔ پولیو نا چٹفنگ اسکان آرام اٹ تولپنہ۔ پولیو دین انا پورو چٹفنگ کن نن غٹ ءِ تینا زمواری ءِ پورو کننگ نا سخت گرج ءِ۔ ننا مسخت پنچ سال اسکان نا غٹ چناتے رکھی پڑی تا رسینگ ءِ پک کننگ نا ءِ۔ پولیو کن حساس گوندنگوک ضلع غاک ننااولیت ءُ۔ اوپارے کہ دا علاقہ غاتیان پولیو دین انا چٹفنگ و ایلو علاقہ غاتے دین آن رکھ کروئی ءِ۔ غٹ لمہ و باوہ غاتیان خواست کیوہ کہ تینا چناتے مہم اٹی رکھی پڑی ضرور کنفر۔ پولیو دین داسکان ننا چاگڑد اٹ ساڑی ءِ۔ اوپارے کہ دین آن ہموتم آ پورو نجات مننگ کیک ہراتم غٹ چناتسکان ویکسین نا رسینگ ءِ پک کینہ۔ راج انا ہر تپہ پولیو نا چٹفنگ کن حکومت تون تفے۔ لاچاری و معذوری ننا قوم انا آخبت اف، پڑی کنفنگ آن چناتے مچ آ زند انا معذوری آن بچفنگ مریک۔