پاکستان نا برکس دیوان نا سرسہب مہمانداری آ چین ءِ مبارکباد، تنظیم نا اسہ باسک ملک اسے نا کنڈآن پاکستان نا دیوان اٹی بشخ ہلنگ ءِ توننگ آ است ہسونی نا درشان، ترجمان دفتر خارجہ

اسلام آباد۔ 27 جون (اے پی پی) پاکستان برکس دیوان نا سرسہب مہمانداری آ چین ءِ مبارکبادی ترسا تنظیم نا اسہ باسک ملک اسے نا کنڈآن پاکستان ءِ دیوان اٹی بشخ ہلنگ آن توننگ آ است ہسونی نا درشانی ءِ کرینے۔ برکس دیوان نا وخت آ اڈہلوک آ ‘جہانی شونداری آ بڑزکو کہولی مکالمہ’ نا بارواٹی ترجمان دفترخارجہ دوشنبے نادے آ جاری بیان اٹی پارے کہ پاکستان جہانی برادری ءِ مون تروک چیلنج آتون مون تننگ کن برکس نا باسک ملک آتون اوار غٹ پدتموک ملک آتون سلوک ءِ۔ دا سال ‘‘ جہانی شونداری آ بڑزکو کہولی ڈائیلاگ’’ برکس نا کنڈآن اڈتننگا ہراٹی چندی پدتموک و مون آ بروک زرگزران تے بٹنگ انگاسس۔ بیان اٹی پاننگاکہ چین مہماندار ملک مننگ نا ناطہ برکس دیوان آن مست پاکستان تون گپ وتران اٹی اوار مسنے، برکس باسک ملک آتون سلابت آن پد فیصلہ کننگک وخت اس کہ غیر رکن ملک آتے دیوان اٹی بشخ ہلنگ نا سلہ خلنگک۔ ترجمان داہیت آ است ہسونی نا درشانی ءِ کرے کہ اسہ باسک اس پاکستان نا بشخ ہلنگ ءِ تورے ولے نن اومیت کینہ کہ تنظیم نا آخبت نا شمولیت پدتموک دنیا نا جم فائدہ غاتے مون آ تخسا و داوڑاٹ شمولیت نا اصول آتیا مبنی مریک ہراکہ تنگ جغرافیائی سیاسی گڑتی تیان مبرامرے۔ ترجمان دفترخارجہ تینا بیان اٹی مستی پارے کہ نن پدتموک ملک آتا فائدہ غاتا مون آ دننگ اٹ چین نا کڑد انا ستاءِ کینہ۔ پاکستان چین اتون اواری اٹ جہانی امن، اسیجائی شونہالی و جامع شونداری کن اسہ سوگو ءُ توار اس مسنے۔ پاکستان جی 77 پلس چین نا ساڑی سروک ءِو گلوبل ڈویلپمنٹ انیشی ایٹیو نا سنگت آتا ٹولی نا ہم بشخ ءِ۔ ترجمان پارے کہ پاکستان و چین ہمہ وخت سٹریٹجک شریدار ءُ و ننا آہنی ایلمی سوگو بنداو تیا ٹی ءِ ، پاکستان و چین ہڑتوم آ کنڈآتا کثیر جہتی کہول آتیا ہمہ جہتی کمکاری ءِ بڑزکو کہول آتسکان دننگ کن پورو وڑاٹ سنبرینگوک ءُ۔ داہیت ذکر انا قابل ءِ کہ برکس تنظیم اٹ برازیل، روس، بھارت، چین و سویلی افریقہ اوار ءُ۔