جاپان کشمیر نا ویل ءِ ایسر کرفنگ کن تینا پبی کڑد ءِ ادا کننگ کیک، بیرسٹر سلطان محمود چوہدری

اسلام آباد۔ 27 جون (اے پی پی) صدر ریاست آزاد جموں و کشمیر بیرسٹر سلطان محمود چوہدری پارینے کہ جاپان کشمیر نا ویل ءِ ایسر کرفنگ کن تینا پبی کڑد ءِ ادا کننگ کیک وخت اس کہ جاپان ایشیا ٹی اسٹ انگا ملک ءِ ہرا ڈیہہ ٹی گچینی کن تینا کڑد ءِ ادا کننگ کیک ۔ پاک بھارت ہڑتوم آ ایٹمی واکدار ءُ و ہڑتوم آ ملک آتا نیام اٹ چنکو یا بھلو شکست اس اسہ بھلو جنگ اسے نا پیش خیمہ جوڑ مننگ کیک۔ جاپان دُن تو تینٹ ہم ایٹمی بھسکاری تیان زہمی مسنے ہنداخاطرآن او سویلی ایشیا نا حالیت آتے جوانی اٹ پہہ مننگ کیک ہنداخاطرآن جاپان ہڑتوم آ ملک آتا نیام اٹ کشمیر نا ویل انا ایسری کن تینا کوشست آتے کے۔ داخیا ل آتا درشانی ءِ او دوشنبے نادے آ داڑے ایوان صدر کشمیر ہاؤس اسلام آباد اٹی جاپانی ایمبیسی نا پولیٹیکل کونسلر ناکاگاوایاسوشی تون اسہ اوڑدہی اسے ٹی کرے۔ صدرآ زاد جموںو کشمیر بیرسٹر سلطان محمود چوہدری داوخت آ مستی پارے کہ جاپان ناگاساکی و ہیروشیماٹی ایٹمی بھسکاری تے خنانے ہنداخاطرآن او سویلی ایشیا نا حالیت آتیان جوانی اٹ بلد مننگ کیک انتئے کہ پاکستان و بھارت ایٹمی واکدار ءُ، ہڑتوم آتا نیام اٹ چنکو یا بھلو واقعہ اس سویلی ایشیاٹی اسہ سنگین ءُ حالیت اسے ودی کننگ کیک ہراکہ مچ آ دنیا نا امن کن خطرہ نا سوب مننگ کیک، ہنداخاطرآن جاپان ہڑتوم آ ملک آتا نیام اٹ کشمیر نا ویل ءِ ایسر کرفنگ کن تینا کوشست آتے کے۔