اسلام آباد۔ 24 جون (اے پی پی) وزیراعظم شہباز شریف زرگزرانی خودکفالت و خود انحصاری نا دوئی کننگ و مون تروک چیلنج آتا مون ءِ توننگ کن گرینڈ نیشنل ڈائیلاگ و میثاق زرگزران نا سلاہ نا درشانی ءِ کرسا نیزگاری و کبینی ٹی کمتی کن بھلا صنعت آتیا 10 درسد سپر خراج و سالانہ 15 کروڑ ، 20 کروڑ، 25 کروڑ و 30 کروڑ روپئی آن زیات کٹیا والا صاحب ثروت بندغ آتیا خراج خلنگ نا پڑو کرینے و پارینے کہ مدام مشکل وخت و چیلنج آتیٹی نیزگار بندغ قربانی تس، اینو صاحب ثروت بندغ آتے قربانی تروئی مریک، ریاست نا زمواری ءِ کہ امراء تیان خراج ہلسا نیزگار آتیا خڑچ کے، بروک آ مالی سال انا بجٹ زرگزرانی حالیت آتے سوگو کننگ نا بجٹ ءِ، دے و نن خواری کرسا لوڈو کنوک آ زرگزران ءِ پار خلینہ، چندی مد آتیٹی سالانہ کم و ود اِراہزار ارب روپئی نا خراج غیب مریک، خراج ہلنگ اٹ ودکی و خراج دُزی ءِ توننگ کن پوسکن آ ٹیکنالوجی ءِ کاریم اٹ اتنگک، نیزگاری، بے روزگاری و خار تا دیوال ءِ بٹوئی مریک۔ جمعہ نادے آ داڑے ملکی زرگزرانی حالیت آتا بابت دیوان نا کماشی ءِ کرسا وزیراعظم پارے کہ مسکوہی حکومت نا ناتجربہ کاری و کرپشن آن ملکی زرگزران ءِ بھاز نسخان مس و بدترین کرپشن کننگا، چندی فیصلہ غاتیٹی تاخیری چم ءِ کاریم اٹ اتنگسا کننگا، زرگزران خواتہ مننگ والا ئس ولے ننا گام گیج آتیان پاکستان خواتہ مننگ نا حالیت آتیان بچک و ملک اٹی شونداری و شونہالی نا انقلاب اس بریک، وزیراعظم دا رداٹ فیصلہ غاتیا قوم ءِ پت اٹ ہلسا نیزگار ی ءِ کم کننگ کن بھلا صنعت آتیا 10 درسد سپر خراج خلنگ ءِ، دا صنعت آتیٹی سرمٹ انڈسٹری، اسٹیل، شوگر انڈسٹری، تیل وگیس ، کھد، ایل این جی ٹرمینل، بینکاری صنعت، آٹوموبیل، سگریٹ انڈسٹری، کیمیکلز و بیوریجز آ 10 درسد سپر خراج لگک۔ اوپارے کہ سگریٹ انڈسٹری ٹی 60 درسد غیررسمی بشخ آن خراج مچ مریک ولے 40 درسد خراج ہلنگپک۔ ریاست نا زمواری ءِ کہ امراآن خراج ہلسا نیزگارآتیا خڑچ کے، اوپارے کہ نیزگاری ٹی کمتی کن صاحب ثروت بندغ آتیا ہم خراج خلنگ نا سلاہ ءِ، ہرابندغ آتا سالانہ کٹیا 15 کروڑ روپئی آن زیات ءِ اوفتیا اسہ درسد، 20 کروڑ آن زیات کٹیا غا 2 درسد، 25 کروڑ روپئی آن زیات کٹیا غا 3 درسد و 30 کروڑ روپئی آن زیات کٹیا غا 4 درسد خراج خلنگ انگ ءِ غٹ تعلقدار ادارہ و حلیف جماعت آتون اواری اٹ خراج دُزی نا مون ءِ تورنہ، سالانہ کم و ود اِرا ہزار ارب روپئی نا چندی مد اٹی خراج غیب مریک، خراج ہلنگ اٹ ودکی کننگ وزیراعظم آن ہلیس بنجا و صوبہ غاتسکان غٹ ادارہ غاتا زمواری ءِ، ٹیم تے جوڑ کننگانے بجٹ آن پد وزارت خزانہ، ایف بی آر ، ایکسائز اینڈ ٹیکسیشن تون اوار غٹ ادارہ غاتا کمک اٹ پوسکن آ ٹیکنالوجی ءِ کاریم اٹ اتسا خراج دوئی کننگک۔ اوپارے کہ زرگزرانی شونداری و نیزگار آتا حالیت ءِ بدل کننگ کن ہراگام گیج آتے کننگ انگ ءِ، داڑآن قومی خزانہ ٹی گچینی بریک، نیزگار آتا زند اٹی آسودگی مریک، بے روزگاری و زرگزرانی بدحالی چٹک و زرگزرانی خودانحصاری و خود کفالت دوئی مریک، د ازرگزرانی خودانحصاری و خودکفالت نا کنڈآ اولیکو گام ءِ۔ اوپارے کہ آئی ایم ایف تون مذاکرات مسنے و اگہ پین شڑت عائد متو تو ننا معاہدہ مریک، پاکستان ءِ بھلا خطرہ غاتیان بچفنگ کن قومی سیوتی حکومت نا راہشون آک اواری اٹ جیرت مندانہ فیصلہ کرینو، گونڈ مد اکن مشکل بریک ولے دا فیصلہ غاتے اٹ مشکل آتیان پیش تمنہ و پاکستان قائد اعظم نا متعین کروک مزل نا کنڈآ روان دواں مریک۔ وزیراعظم پارے کہ حکومت ءِ سنبھالنگ آن پد ننتون اِرا کسر ئسر، اسٹ گچین کاری اصلاحات کرسا گچین کاری تا کنڈآ کان و ارٹ میکو کسر دا ئس کہ سخت فیصلہ کین و ڈبنگوک آ زرگزران ءِ سنبھالن، اولیکو کسر آسان ئس ۔ وزیراعظم پارے کہ دا ننا اولیکو بجٹ ءِ ہرا درحقیقت پاکستان نا زرگزرانی حالیت آتے سوگو کننگ نا بجٹ ءِ و دانا مسخت نیزگار الس، جنوزان و چوری تے کبینی نا بھاریم آن کشنگ و حالیت آتا بھلا سختی تیان بچفنگ ءِ، زند اٹی مشکل بریک ولے اللہ تعالیٰ نا ذات آ بھروسہ کین و سخت خواری ءِ تینا کین تو اسہ مشکل اس ہم مشکل سلپک۔ اوپارے کہ بجٹ گام گیج آن نیزگار آتا کوپہ غاتیان بھاریم ءِ کم کننگک، صاحب ثروت بندغ آتیان قوم اومیت کیک کہ مون آ برسا ڈکھیائی انسانیت نا دوتے سبک کیر و ملک ءِ باوقار و شون ہلوک ملک اس جوڑ کننگ کن دولت نا گڑاس بشخ ءِ بشخر، انصار مدینہ نا یات ءِ تازہ کیر، تاریخ گواہ ءِ کہ مدام مشکل وخت و چیلنج آتیٹی نیزگار آ بندغ قربانی تس، اینو صاحب ثروت بندغ آتے قربانی تروئی مریک۔ اومیت ءِ کہ او دا عظیم کاریم اٹ تفسا سخاوت نا درشانی ءِ کیرہ، اولیکو بجٹ ءِ ہراٹی اکنامک وژن تننگانے، داڑآ وزیرخزانہ، وزیر واپار ، وزیر بجلی، وزیر پیٹرولیم ، زرگزرانی ٹیم ، ننا سرکڑدہ، نواز شریف، آصف علی زرداری، بلاول بھٹو زرداری، مولانا فضل الرحمان ، ایم کیو ایم ، باپ پارٹی و اے این پی نا پبی کمک دوئی مسنے ، دا زرگزرانی وژن ملک ءِ شونداری نا کنڈآ دیک و کبینی نا طوفان ءِ توننگ اٹ کمک کیک۔ وزیراعظم پارے کہ او سرسوز باغ نشان تفک ، زرگزرانی وتواجہی کن جان نا بازی ءِ خلیوہ و داتغ انا پوروی کن کوشست کینہ ہراڑے پاکستان جوڑ مس و لکھ آ مخلوق تینا جون تے ندر کرے۔
