اسلام آباد۔ 24 جون (اے پی پی) قومی اسمبلی ٹی بروک آ مالی سال 2022-23ء نا بجٹ آ سینیٹ نا کنڈآن دوئی مروک آ سلاہ و سوج آتے پیش کننگا ہرافتے ٹی خیبرپختونخوا نا اوار مروک قبائلی علاقہ غاتے فیڈرل ایکسائز ڈیوٹی ٹی استثنیٰ تننگ، سوڈا، جوس و انرجی ڈرنک آتیٹی شوگر نا کچ ءِ کم کننگ کن گام گیج کننگ، موبائل فون آ ایڈوانس آئی ٹی خراج اٹی 8 درسد کمتی کننگ، فارماسیوٹیکل کمپنی تا کنڈآن 15 فروری 2022ء اسکان جمع کرفوک آ سیلز خراج ءِ دمدستی وڑاٹ ریفنڈ کننگ نا سفارش کننگانے۔ جمعہ نادے آ قومی اسمبلی ٹی سینیٹ نا کنڈآن گدریفوک آ سلاہ و سوج آتے پیش کننگا ہرافتے ٹی غیر منافع بخش تنظیم تے انکم خراج آن استثنیٰ و اوفتے ایلو شیڈول اٹی اوار کننگ نا سلاہ تننگا۔ قومی اسمبلی ٹی دا سلاہ و سوج آتیا شرہ ٹی بشخ ہلسا مولانا عبدالاکبر چترالی پارے کہ سینیٹ آن 37 پنہ غاتیا تالان سلاہ و سوج بسنے ولے کس اس ملک ءِ خورک کروک آ نظام ، سودی کاروبار نا بابت ہچ ءُ سلاہ اس تتنے۔ مسکوہی فاٹا ءِ فیڈرل ایکسائز ڈیوٹی ٹی اِلنگ نا سفارش کننگانے، اونا تائید ءِ کینہ۔ داٹی پاٹا(مالاکنڈ ڈویژن ) ءِ اوار کرسا 2035ء اسکان غٹ خراج آتیان مستثنیٰ گوندنگے۔ مچ آ ملک انا غٹ ہسپتال آتے خراج اِلنگ نا سفارش اہم ءِ۔ موبائل فون آ ایڈوانسڈ خراج ءِ کم کننگے، سرکاری ملازم آتا تنخواہ تیٹی 15 درسد ودکی کم ءِ۔ کوویڈ۔ 19 نا سوب آن اوفتا تنخواہ تیٹی ودکی کننگتو۔ 20 درسد کم آن کم ودکی کننگے۔ پنشنر آتا پنشن کم ءِ، اوٹی ودکی کننگے۔ شوگر آن جوڑ مروک آ ڈرنک امراض قلب و شوگر نا سوب ءِ، اوفتیا پابندی خلنگے یا خراج ءِ ودفنگے۔ پی ٹی آئی نا باسک وجیہہ قمر پارے کہ فارماسیوٹیکل مواد آ 17 درسد خراج ءِ صفر کننگے۔ آئی ٹی انڈسٹری آ خراج کریڈٹ نا چٹفنگ آ نظرثانی کننگے۔ این جی او تے سکینڈ شیڈول اٹ اوار کننگ و خراج چھوٹ تننگے دا سلاہ اہم ءِ۔ پی ایس ڈی پی ٹی زالبول باسک آتیکن ڈٹ آتا بابت کمیٹی اس جوڑ کننگے، سینیٹ اسمبلی نا ملازم آتیکن بایدے اعزازیہ اس مرے۔
