اسلام آباد۔ 22 جون (اے پی پی) وزیراعظم شہباز شریف پارینےکہ پیشن نا ملک پاکستانیک اسہ دے اٹی 57 ملین ڈالر وطن آ گدریفسا پوسکن ءُ ریکارڈ اس جوڑ کرینو، روشن ڈیجیٹل اکاؤنٹ اٹی جمع کرفوک آ زر 4.5 ارب ڈالر آن ودانو۔ وزیراعظم آفس نا میڈیا ونگ آن جاری بیان و وزیراعظم نا ٹویٹ نا رداٹ وزیراعظم شہباز شریف اسہ دے اٹی ریکارڈ 57 ملین ڈالر پاکستان آ گدریفنگ آ پیشن نا ملک پاکستانی تے خراج تحسین پیش کرے و اوفتا منت واری ءِ ہرفے۔ اوپارے کہ تدوک آ دے اسہ دے اٹی غٹ آن زیات 57 ملین ڈالر اسٹیٹ بینک ءِ دوئی مسنے۔ دازر ءِ پیشن نا ملک پاکستانی تا کنڈآن اسہ دے اٹی گدریفوک آ داتم اسکان نا غٹ آن زیات زر ءِ۔ اسہ دے اٹی بروک آ دا زر آن پد روشن ڈیجیٹل اکاؤنٹ اٹی جمع کرفوک آ زر انا کچ 4.5 ارب ڈالر آن گدرینگانے۔ اوپارے کہ ننا حکومت روشن ڈیجیٹل اکاؤنٹ اسکیم نا پورو مخ تفی و سرپرستی ءِ کننگ ءُ۔ اسہ دے اٹی ریکارڈ زر گدریفنگ آ پیشن نا ملک پاکستانی تا منت واری ءِ ہرفنہ۔ وزیراعظم پارے کہ پیشن نا ملک پاکستانی ننا نہادی میرات ءُ ہرافتا است پاکستان نا مہرومریبت اٹ دھڑکک۔ پیشن نا ملک پاکستانی درملکی زرمبادلہ نا کمک اٹ مدام ملکی زرگزران نا سوگوی و گچینی ٹی کڑد ادا کیک۔ نم تون قول ءِ کہ ساڑی زرگزرانی مشکل آتا مین آن کشا نما اومیت آتیا پورو سلنہ۔ وزیراعظم پارے کہ اودے پورو یخین ءِ کہ پیشن نا ملک رہینگوک پاکستانی آخبت اٹ ہم پاکستان نا کمک ہنداخلوص و جوزہ اٹ کرسا کیرہ۔ پیشن نا ملک رہینگوک پاکستانی تا آسراتی کن ساڑی حکومت چندی گام گیج کننگ ءِ۔
