اسلام آباد۔ 22 جون (اے پی پی) بنجائی وزیر حوالکاری و شینکاری مریم اورنگزیب پارینے کہ حکومت پیمرا کانود اٹ ترمیم اتنگ ءِ، 2019ء ٹی سپریم کورٹ نا فیصلہ غان پد چینل آتا درجہ بندی کننگا، مسکوہی دور اٹی میڈیا ہاؤس آتے جاری مروک آ اشتہار آتے صحافی تا تنخواہ تا ادائیگی تون منسلک کننگتو، مسکوہی دور اٹی صحافی تے برمتہ و اوفتیا تشدد نا واقعہ پیش بس، ننا دورا ٹی دُن ءُ ہچ ءُ واقعہ اس مون آ بتنے، صحافی تابرخلاف درج ایف آئی آر آتیا تعلقدار آئی جی تے بٹنگسا اوفتے موقف ءِ خف توننگے۔ داخیال آتا درشانی ءِ او چارشنبے نادے آ سینیٹ اٹی قائمہ کمیٹی حوالکاری و شینکاری نا دیوان اٹی گپ وتران کرسا کرے۔ کمیٹی نا دیوان نا کماشی ءِ سینیٹر فیصل جاوید کرے وخت اس کہ دیوان اٹی کمیٹی نا ایلو باسک آک ہم ساڑی ئسر۔ داوخت آ گپ وتران کرسا بنجائی وزیر حوالکاری پارے ک پیمرا نا بابت ترمیم اٹی جوائنٹ ایکشن کمیٹی تون گپ وتران چلینگ انگ ءِ، نن جوائنٹ ایکشن کمیٹی نا سلابت اٹ ترمیم اتنگ اُن ۔ اوپارے کہ انت کہ ترمیم اس مریک او غٹ اسٹیک ہولڈر آتا سلابت اٹ مریک ۔ اوپارے کہ مسکوہی دور اٹی تنخواہ تفروک آ میڈیا ہاؤس آتا اشتہار آتے بند کننگتو و نئے اوفتے صحافی تا تنخواہ تا زرتس اتون منسلک کننگا۔ بنجائی وزیر حوالکاری پارے کہ ورکرآتا تنخواہ و کنٹریکٹ نا بابت کانود اس اتنگ انگ ءِ۔ اوپارے کہ 2019 ء ٹی سپریم کورٹ نا فیصلہ غان پد چینل آتا درجہ بندی ءِ کننگا، داکان مست اے ، بی و تھری کیٹیگری نا لحاظ اٹ اشتہار جاری کننگاکہ۔ دادرجہ بندی آن مست پی آئی ڈی نا اشتہار آتا نظام ہم شفاف ئس۔ اوپارے کہ چینل آتا درجہ بندی پروگرام و وخت انا حساب اٹ کننگا، اشتہار آتا جاری کننگ اٹ شفافیت ءِ پک کننگا، اسہ چینل اسے ٹی ہم پرخ کننگتو۔ اوپارے کہ مسکوہی وزیر حوالکاری فواد چوہدری تینا دور اٹی چینل آتا کیٹیگری ءِ بدل کرے۔ بنجائی وزیر حوالکاری پارے کہ مسلم لیگ (ن) نا حکومت آجوئی صحافت آ پورو یخین تخک ، مسکوہی دور اٹی صحافی تے برمتہ کننگا و اوفتیا تشدد نا واقعہ پیش بس، ننا دوراٹی ہچ ءُ دُن ءُ واقعہ اس پیش بتنے۔ اوپارے کہ مسکوہی چار سال صحافی ، میڈیا ورکر و میڈیا ہاؤس آتون انتس کہ مس او تہار ءُ دور اس ئس۔ مسکوہی دور اٹی سلاہ درشانی نا آجوئی آ قدغن خلنگا، صحافی تے برمتہ کننگا، اوفتیا تشدد کننگا۔ مریم اورنگزیب پارے کہ ابصار عالم مرے، اد طور مرے یا عرفان صدیقی مرے، ہراہرا صحافی تون ظلم مس ای ہرجاگہ غا اوفتے سلوک اسُٹ۔ اوپارے کہ آجو میڈیا حکومت نا احتساب ءِ کیک، میڈیا نا تنقید آن نن مدام راہشونی ہلکونن۔ بنجائی وزیر حوالکاری پارے کہ نن داڑے ساڑی غٹ صحافی تے بنگن، ہرافتا برخلاف ایف آئی آر مس اوفتے ہم بنگونن، جوان ءِ کہ غٹ تعلقدار آئی جی تے بٹنگسا اوفتاموقف ءِ ہم خف توننگے، ہراتم اسکان ایف آئی آر تیا اوفتا موقف بفک، معاملہ کلیئر مفک ہراڑآ کمیٹی صحافی تیا درج ایف آئی آر تا بابت آئی جی تے بروک آ دیوان اٹی بٹنگ نا فیصلہ کرے۔ دیوان اٹی کمیٹی نا باسک آتیان بیدس بنجائی وزیر حوالکاری مریم اورنگزیب، بنجائی سیکرٹری حوالکاری شاہیرہ شاہد، پرنسپل انفارمیشن آفیسر سید مبشر حسن و وزارت حوالکاری نا ایلو بڑزکو کمامدارآک ساڑی ئسر۔
