اسلام آباد۔ 21 جون (اے پی پی) وزیراعظم محمد شہباز شریف پارینے کہ مسکوہی حکومت نا بدترین زرگزرانی پالیسی و عاقبت اندیشی نا سوب آن بھاز بھلو زرگزرانی چیلنج اس مون تروک ءِ ، زرگزران ءِ سنبھالنگ کن دلیرانہ فیصلہ غاتیان پاناد کپنہ، دے و نن نا خواری اٹ قوم ءِ زرگزرانی مشکل آتیان کشنہ، انشاء اللہ جوان انگا وخت ہم بریک۔ سے شنبے نادے آ کابینہ دیوان آن پد گپ وتران کرسا وزیراعظم پارے کہ قوم بدبختی اٹ مسکوہی حکومت نا بدترین زرگزرانی پالیسی ، بے انتہا ہیبدار کارکڑد و عاقبت اندیشی نا بھرم ءِ کُننگ ءِ۔ داننکن بھاز بھلو زرگزرانی چیلنج اسے، ہرا ننے میرات اٹی ملانے ۔ وزیراعظم پارے کہ مسکوہی حکومت ہِننگ تون پیٹرولیم نا نہاد ہرا مچ آ دنیا ٹی آسمان تون ہیت کننگ ءُ، کم کرسا بروک آ حکومت کن جال اس تالان کرے، دا بدنیتی آ مبنی گام اس ئسک۔ اگہ مسکوہی حکمران تے الس نا داخہ درد مسکہ تو 3 سال اٹی اسہ جوان ءُ درور اس کریکہ و الس نا حقی راجی آسراتی کن گڑاس کریکہ۔ جہانی کہول آ مشکل حالیت مون تروک ءِ و پیٹرولیم مصنوعات آتا نہاد آک ودنگ ءُ ننے ہم مجبورا نہاد آتے ودفوئی تما ولے داڑتون نن 7 کروڑ نیزگار مخلوق کن ریلیف نا ہم پڑو ءِ کرین و بی آئی ایس پی نا کمک اٹ 2000 روپئی ماہانہ ملک انا کروڑ آ نیزگار مخلوق ءِ تننگ انگ ءِ۔ وزیراعظم پارے کہ دا فیصلہ بجت اٹ نیزگار تپہ غا بھاریم ءِ کم کننگ کن کننگا۔ صاحب حیثیت تپہ غاتیا خراج خلنگا تانکہ لس بندغ ءِ دا احساس مرے کہ اوفتا حکومت اوفتا بھاریم ءِ بشخنگ کن گام گیج کننگ ءِ۔ وزیراعظم پارے کہ او اومیت تخک کہ ملک انا ہزگار تپہ زیات خراج ترسا حکومت تون تفک۔ ہنداوڑ حکومت زیات خراج جمع کرسا نیزگار آتیا خڑچ کننگ کیک۔ اوپارے کہ مشکل حالیت آتیٹی ہرا زمواری ننے ملانے ، اودے پورو کینہ۔ نن دلیرانہ فیصلہ کرینن پین ہم کروئی تما تو کینہ و زرگزران ءِ سنبھالنگ کن ہروڑنا المی گام گیج کینہ۔ وزیراعظم پارے کہ مشکل فیصلہ غاتیان پد جوان انگا وخت ہم بریک۔ مشکل فیصلہ ننا بیوسی ءِ۔ نن خواری اٹ کاریم کینہ و بھرم تننگ اللہ نا دوٹی ءِ۔ وزیراعظم پارے کہ مسکوہی حکومت آئی ایم ایف تون ہرا معاہدہ غاتے کرے تینٹ اوفتے لتاڑا۔ معاہدہ نا پاسداری ءِ کپننگ نا سوب آن اینو زرگزرانی مشکل مون تروک ءِ، نن دے و نن خواری کرسا قوم ءِ دا مشکل وخت آن کشنہ۔
