اسلام آباد۔ 21 جون (اے پی پی) چیئرمین سینیٹ محمد صادق سنجرانی پارینے کہ روڈ ٹو مکہ ڈٹ حاجی تے آسراتی فراوان کننگ نا بابت بھاز اہمیت تخک، حج کون آ مقدس فرض انا اداکننگ اٹ آسراتی تا فراوانی آن اسلامی ایلمی نا مون آ دننگ اٹ کمک رسینگک۔ داخیال آتا درشانی ءِ او سے شنبے نادے آ روڈ ٹو مکہ پروجیکٹ نا سعودی ڈل اتون پارلیمنٹ ہاؤس اٹی اوڑدہی ٹی کرے۔ اوڑدہی ٹی روڈ ٹو مکہ پروجیکٹ نا بابت پیش رفت آ گپ وتران کننگا۔ سینیٹر مولانا عبدالغفور حیدری و سینیٹر حافظ عبدالکریم ئسک ہم اوڑدہی ٹی ساڑی ئسر۔ چیئرمین سینیٹ محمد صادق سنجرانی پارے کہ روڈ ٹو مکہ ڈٹ حاجی تے آسراتی فراوان کننگ نا بابت بھاز اہمیت تخک۔ پاکستان و سعودی عرب نا نیام اٹ تاریخی برادرانہ تعلقداری ءِ و سعودی عرب ہر مشکل حالیت آتیٹی پاکستان تون تفینے۔ اوپارے کہ غٹ جہانی فورم تیا مسلم امہ ءِ مون تروک ویل آتا بابت ہڑتوم آ ملک آتا موقف اسٹ ءِ۔ چیئرمین سینیٹ پارے کہ روڈ ٹو مکہ ڈٹ ءِ پین ودفنگ نا گرج ءِ و حاجی تیکن روڈ ٹو مکہ آسراتی نا بناءِ کننگ ستاکڑزک۔ اوپارے کہ حج کون آ مقدس فرض انا اداکننگ اٹ آسراتی تا فراوانی آن اسلامی ایلمی نا مون آ دننگ اٹ کمک رسینگک۔ چیئرمین سینیٹ روڈ ٹو مکہ ڈٹ انا بناءِ کننگ آ سعودی حکومت نا منت واری ءِ ہرفے۔ چیئرمین سینیٹ پارے کہ حاجی تے آسراتی فراوان کننگ کن سعودی حکومت تون کمکاری برجاسلک۔ اوپارے کہ سعودی عرب و پاکستان نا الس نا است اوار دھڑکک۔ سینیٹر مولانا عبدالغفور حیدری و سینیٹر حافظ عبدالکریم ئسک ہم پاکستان سعودی عرب تعلقداری تے تاریخی گوندار۔ چیئرمین سینیٹ پارے کہ خادم حرمین شریفین مدام پاکستان سعودی تعلقداری تے اہمیت تسنے و سعودی عرب اٹی رہینگوک آ لکھ آ پاکستانی سعودی عرب نا زرگزرانی شونداری ٹی اہم کڑد ادا کننگ ءُ۔ سعودی ڈل داوخت آ تینا خیال آتا درشانی ءِ کرسا پارے کہ نن پاکستان آ برسا بھاز خوش اُن و پاکستان سعودی عرب کن اسہ اہم ءُ ملک اسے۔ ڈل روڈ ٹو مکہ پروجیکٹ نا گرج و مسخت آتیان چیئرمین سینیٹ ءِ معلومدار کرے و ہڑتوم آ کنڈآتا کمکاری ءِ پین سوگو کننگ نا است خواہی نا درشانی ءِ کرے۔
