جہانی مالیاتی فنڈ اتون زوت معاہدہ مریک، 12 لکھ سالانہ کٹیا غا خراج چھوٹ برقرار سلک، وزیر خزانہ نا پارلیمنٹ اٹی صحافی تتون گپ وتران

اسلام آباد۔ 20 جون (اے پی پی) بنجائی وزیر خزانہ  مفتاح اسماعیل پارینے کہ جہانی مالیاتی فنڈ اتون زوت معاہدہ مریک، پوسکن آ مالی سال انا بنجائی بجٹ اٹی ہزگار آتیا بھاریم شاغنگانے ، 12 لکھ سالانہ کٹیا غا خراج چھوٹ برقرار سلک۔ اوداہیت ءِ دوشنبے نادے آ داڑے پارلیمنٹ ہاؤس اٹی صحافی تتون گپ وتران اٹی کرے۔ وزیرخزانہ پارے کہ آئی ایم ایف تون پاکستان رابطہ ٹی ءِ و اومیت ءِ بھاز زوت اسٹاف کہول انا معاہدہ مریک اوکان پد پاکستان کن قسط جاری مریک۔ اوپارے کہ آئی ایم ایف ملازم آتا تنخواہ تیٹی ودکی و 12 لکھ سالانہ کٹیا غا خراج چھوٹ تننگ آ ہچ ءُ اعتراض اس اف۔ وزیرخزانہ پارے کہ آئی ایم ایف نا تنخواہ تے ودفنگ یا کم کننگ نا باندات تون ہچ ءُ تعلق اس اف۔ بنجائی وزیر پارے کہ حکومت مشکل حالیت آتیٹی متوازن و الس دوست بجٹ اس تسنے۔ حکومت کوشست کرینے کہ ہزگار  و صاحب حیثیت بندغ آتیا زیات بھاریم شاغنگے، اوڑآن چپ تنخواہ دار و کم کٹیا تخوک آ مخلوق کن ریلیف نا جوان گام گیج کننگانے۔