اسلام آباد۔ 20 جون (اے پی پی) وزیرخزانہ ڈاکٹر مفتاح اسماعیل فارماسیوٹیکل صنعت ءِ مون تروک ری فنڈ انا ویل آتا ایسر کننگ نا باور کرفینے۔ اودا باوری ءِ دوشنبے نادے آ داڑے بڑزکو ایوان نا قائمہ کمیٹی خزانہ، محصولات و اقتصادی امور نا دیوان اٹی کرفے۔ کمیٹی نا دیوان سینیٹر سلیم مانڈوی والا نا کماشی ٹی پارلیمنٹ ہاؤس اٹی اڈ ہلک۔ دیوان اٹی بنجائی وزیر خزانہ مفتاح اسماعیل ، وزیر مملکت خزانہ ڈاکٹر عائشہ غوث پاشا، سینیٹرز ، طلحہ محمود، حسن عزیز، ذیشان خانزادہ ، سعدیہ عباسی، انوارالحق کاکڑ، دلاور خان ، شوکت فیاض احمد ترین ، چیئرمین ایف بی آر و وزارت خزانہ نا بڑزکو کمامدارآک ساڑی ئسر، پاکستان فارماسیوٹیکل ایسوسی ایشن نا عہدیدار آک بنجائی وزیر خزانہ ءِ سیلز خراج ریفنڈ نا عدم ادائیگی نا بابت تینا گڑتی تیان معلومدار کریر۔ وزیر خزانہ مفتاح اسماعیل ریفنڈ نا باندات آتے زوت آن زوت کرسا طے کننگ نا پارے، کمیٹی فنانس بل 2022-23نا بابت کمیٹی نا تدوک آ دیوان تیٹی طے کروک بجٹ سلاہ و سوج آتا سرجم جاچ ءِ ہلسا اوفتے گڈیکو دروشم اس تس۔ قائمہ کمیٹی نا کنڈآن طے کروک سلاہ و سوج آتیا تالان سرجم رپورٹ اس سینیٹ دیوان اٹ پیش کننگک۔
