جہانی برادری اوغان باہوٹ آتا دیرینہ حالیت آتے بایدے است آن دپ، ترجمان دفترخارجہ

اسلام آباد۔ 20 جون (اے پی پی) پاکستان پارینے کہ پاکستان نا الس ملک اٹی پناہ گزین تیکن بے مٹ سخاوت، مہمانداری و ہمدردی نا درشانی ءِ کرینے ، جہانی برادری اوغان باہوٹ آتا دیرینہ حالیت آتے بایدے فراموش کپ، پاکستان داوخت آ ہم 30 لکھ آن زیات اوغان تا مہمانداری ءِ کننگ ءِ۔ دفترخارجہ نا ترجمان دوشنبے نادے آ پناہ گزین تا جہانی دے انا وخت آ اسہ بیان اسے ٹی جہانی برادری آن خواست کرے کہ او مچ آ دنیا ٹی پناہ گزین تا ویل آتا ایسر کننگ کن کروک آ کوشست آتون تفے۔ بیان اٹی پاننگاکہ پاکستان پناہ گزین تا جہانی دے انا یات اٹی جہانی برادری تون اوار ءِ، دا دے ءِ اڈ ترسا نن مچ آ دنیا ٹی پناہ گزین تتون تینا یکجہتی نا درشانی ءِ کینہ، دادے ننے یات دہانی کرفک کہ نن جبری ہمپ و بٹ نا سوب آتیا سجفن و جھیڑہ غاتا توننگ و اوفتا ایسر تون اوار پناہ گزین تا حالیت آتیکن پائیدار ایسر اس پٹنگ کن تینا عزم انا درشانی ءِ کین۔ بیان اٹی پاننگانے کہ دادے جہانی بھاریم و زمواری نا شریداری نا اصول آتا رداٹ مہاجرآتا رکھ اکن ننا اجتماعی عزم انا درشانی ءِ کننگ نا ہم موقع اسے۔ بیان نا رداٹ پاکستان چار دہائی آن زیات وخت آن دنیا نا غٹ آن بھلا و مریس انگا مہاجرآتا حالیت آتیان اسٹ نا زمواری ءِ تینا کوپہ غاتیا شاغانے، پاکستان 30 لکھ آن زیات اوغان تا مہمانداری ءِ کننگ ءِ وخت اس کہ 4 لکھ روہنگیا باتیک ہم پاکستان اٹ پناہ ہلکونو۔ بیان اٹی پاننگانے کہ ہندن ہندن مچ آ دنیا ٹی پوسکن ءُ حالیت مون آ بننگ ءِ، جہانی براسدری اوغان باہوٹ آتا دیرینہ  حالیت آتے بایدے فراموش کپ، کوویڈ تون گنڈوک راجی، اقتصادی و جان جوڑی نا چیلنج آتا رداٹ پوسکن آ جہانی عزم انا گرج ءِ، اوغان مہاجر آتیکن باقاعدہ گمانی و جوان مالی امداد نا کمک اٹ اوفتا رکھ و باوقار پدی ہِننگ نا گرج ءِ۔ دفترخارجہ تینا بیان اٹی پارے کہ اوغانستان نا سوگوی و پائیدار راجی و اقتصادی شونداری کن المی گام گیج کننگ اہم ءِ تانکہ آخبت اٹ مہاجر آتا ملک آن پیش تمنگ نا گمان ءِ توننگ مرے۔ پاکستان دادے انا رداٹ اقوام متحدہ نا پناہ گزین ایجنسی یواین ایچ سی آر ءِ مچ آ دنیا ٹی پناہ گزین و میزبان کمیونٹی تا مخ تفی نا ستاکڑزوک کاریم آ خراج تحسین پیش کرسا پارے کہ پاکستان یو این ایچ سی آر تون تینا قابل قدر شریداری ءِ پین سوگو کننگ نا چاری ءِ، نن جہانی برادری آن خواست کینہ کہ او مچ آ دنیا ٹی پناہ گزین تیکن پائیدار ایسر کن اونا کوشست آتیٹی تنظیم تون تفے۔