کوویڈ۔ 19 اٹی زہمی مروک بروک آ طالب علم آتا اولیکو بیج دُوارہ چین آ روانہ مننگ ءِ ہراڑآ چناتے مبارکباد پیش کینہ، رانا تنویر حسین

اسلام آباد۔ 20 جون (اے پی پی) بنجائی وزیر تعلیم و کسبی تربیت رانا تنویر حسین پارینے کہ چین نا چندی یونیورسٹی تیان کوویڈ۔ 19 اٹی زہمی مرسا بروک آ طالب علم آتا اولیکو بیج غٹ اڑاند آتے مرکرسا دُوارہ چین آ روانہ مننگ ءِ ہراڑآ چناتے مبارکباد پیش کینہ، ورناتا تعلیم و تربیت ننا قومی فرض ءِ ، داٹی ہچ ءُ ڈیوالئی اس کننگپک۔ داخیال آتا درشانی ءِ او نن نیمہ غا اسلام آباد انٹرنیشنل بالی پٹ آ طالب علم آتا سپاروکی دود آن تران کرسا کرے۔ بنجائی وزیر پارے کہ چناک اِراسال آن مشکل آتا گواچی ئسر ہرافتا کچ 5832 جوڑ مریک ہرافک تینا آخبت کن وزارت خارجہ، وزارت تعلیم، ہائر ایجوکیشن تون رابطہ کریر، داحساس باندات ءِ ہرسا نن چینی کمامدار و پاکستانی سول ایوی ایشن و پی آئی اے کمامدارآتون رابطہ کرین۔ ایچ ای سی دا بابت خصوصی گام گیج کرے ہرا ستاکڑزک۔ اوپارے کہ داسہ غٹ اڑاند آک مر مسنو و 105 طالب علم آتیا تالان اولیکو بیج چین آ روانہ مننگ ءِ ہراڑآ چینی حکومت و پاکستان اٹ چینی سفارت خانہ نا کمامدارآتا ہم منت واراُن ہرافک دا طالب علم آتا پدی ہِننگ کن ننا کوشست آتے سوگوی تسنو۔ اوپارے کہ دا ننا زمواری و قومی فرض ءِ ہراٹی نن سرسہب مسونن۔ پاکستان انٹرنیشنل ایئر لائن ہم اختہ انگا حج آپریشن آن پد ہم طالب علم آتیکن خصوصی جہاز انا بست وبند کرے ہرانا خڑچ آتے ہائیر ایجوکیشن کمیشن و طالب علم آتا لمہ و باوہ سگانو۔ بنجائی وزیر پارے کہ اولیکو بیج انا روانہ مننگ آن پد ایلو طالب علم آتا ریسہ وار پدی ہِننگ نا کسر آوار مسنے و بھاز زوت ایلو سلوک طالب علم آک ہم تینا تعلیمی کیریئر نا دوارہ بناءِ کننگ کیرہ۔ داوخت آ طالب علم آتا نمائندہ سلمان علی گپ وتران کرسا پارے کہ چینی صدر شی جن پنگ، وزیراعظم پاکستان محمد شہباز شریف و بنجائی وزیر تعلیم رانا تنویر حسین نا منت وار اُن ہرافتا کوشست آتیان ننے اینو دا دے ءِ ہُننگ نصیب مسنے و 105 طالب علم تینا تعلیمی کیریئر نا چرجوئی نا دُوارہ بناءِ کننگ والا ءُ۔ اودارداٹ سیکرٹری تعلیم  گودی ناہید درانی و ایچ ای سی نا میڈم شائستہ نا ہم منت واری ءِ ہرفے ہرافک لمحہ بہ لمحہ نئے بیرہ طالب علم آتون رابطہ تخار بلکن ننا راہشونی ءِ ہم کرسا کریر۔