سیاسی و زرگزرانی چرجوئی آن بیدس شونداری مننگ کپک، شونداری کن ننے پالیسی تا چرجوئی نا اہمیت ءِ سمجھوئی مریک، احسن اقبال

اسلام آ باد۔ 20 جون (اے پی پی) بنجائی وزیر ڈٹ بندی شونداری و اصلاحات و خصوصی گام گیج احسن اقبال پارینے کہ سیاسی و زرگزرانی چرجوئی آن بیدس شونداری مننگ کپک، دنیا کس اسے نا انتظار ءِ کپک، نن تینا ردینک آتے سہی کروئی ءِ، شونداری کن ننے پالیسی تا چرجوئی نا اہمیت ءِ سمجھوئی مریک، وژن 2025 آ عملدرآمد مسکہ تو پاکستان 25 گچین زرگزران تیٹی اوار مسکہ۔ داخیال آتا درشانی ءِ او دوشنبے نادے آ گرینڈ نیشنل ڈائیلاگ نا رداٹ پاکستان نا اقتصادی لائخی ءِ گچین کننگ نا بابت سیمینار آن تران کرسا کرے۔ بنجائی وزیر پارے کہ پاکستان 2000 آن پد اسہ جنگ اسے ٹی ہنا، کس اسے نا جنگ اٹی اوار مننگ آن پد پاکستان ولدا دائرہ غاتیٹی ہنا، نن کیہی سال زیان کرین 2006 آن پد توانائی نا اسہ تنکی اس ودی مس، 2013آ ننا حکومت بس و نن وژن 2025 تسن، احسن اقبال پارے کہ ہراتم نن وژن 2025 تسن ہموتم ملک اٹی شانزدہ شانزدہ گھنٹہ نا لوڈشیڈنگ ئس، دنیا اولیکو وار ننے آخبت کن اسہ سوگو زرگزرانی ملک اس مننگ بناکریسس، 2017 ٹی ولدا حکومت نا چرجوئی چٹا واینو 2022 اٹی حالیت آک ہمونگ ہنانو، اینو نن چار سال آن پد حکومت ءِ سنبھالانن تو شونداری بجٹ 550 ارب اسکان رہینگاسس، شونداری بجٹ کن ہم وزارت خزانہ نا سرکلر بس کہ آخیریکو مسہ تُو اکن زر دستیاب اف ، دا تاریخ اٹی اولیکووار مس کہ وزارت خزانہ فنڈ مفننگ نا سوب آن شونداری کاریم تیان تورے، اینو ہراتم نن 75 می سال دے ءِ اڈتننگ اُن تو نن تدوک آ سفر آن ہچ اس دوئی کننگ کتون۔ اوپارے کہ سی پیک نا بونس ہراتم ملا تو پارینہ کہ قدرت ننے مسٹ میکو وار ٹیک آف نا موقع ملا، ارٹ میکو موقع 1991 نواز شریف دور اٹی اکنامک ریفارمز درستی راستی کرفین، ہمووخت آ پرائیویٹ بنک، ٹیلی کام سیکٹر آتے موکل تسن و پین اصلاحات درستی راستی کرفین ، او حکومت ءِ اِراسال آن پد رخصت کننگا، منموہن سنگھ سرتاج عزیز آن ایس آر اوز نا کاپی اس ہلسا اوتینا ملک اٹی درستی راستی کرفے، اینو ہرپاکستانی کن سنجیدگی نا وخت ءِ، نن تینا بروک آ چین ءِ ہندن ءُ کسر اس ایتنہ کانہ کہ مستین نا ردینک آتے دُوارہ کننگپ۔ اوپارے کہ بروک آ سال 7 ہزار ارب  خراج ریونیو نا کساس ءِ، 2 ہزار ارب نا نان خراج ریونیو ءِ، دا 9 ہزار ارب آن 41 سد ارب  صوبہ غاتے تننگک، بنجائی حکومت تون چار ءُ نیم ہزار ارب بچک، درملکی وام تا مد اٹی 2015-16ٹی 1500 ارب نا بھاریم ئس ہرا ودسا 4 ہزار ارب مسنے۔ اوپارے کہ 530 ارب پنشنر آتا ءُ۔ 4 سد ارب دفاعی و 130 ارب سول پنشن نا ءُ، دافتے ٹی 700  سد ارب شونداری بجٹ ءُ، 1200 ارب نسخان والا ادارہ و صوبہ غاتے گرانٹ آتا مد اٹی ءُ، چندی سبسڈی تا مد اٹی 700 ارب تخانن۔ اوپارے کہ نن ایکسپورٹ آ مبنی زرگزران آ ہنتون ہراملک آک شون ہلکر اوایکسپورٹ ءِ بنداوی ذریعہ جوڑ کریر، سیاسی نزوری نا سوب آن زرکار اسے ننا ملک پرکشش نظر بتو، ننا ملک اٹی کم سیونگ و انویسٹمنٹ ریشو ءِ، نن دا ملک اٹی ہیومن ریسورس ءِ گوجالان، اسہ ملک اس ہم دُن ءُ اف ہرا 60 درسد خواندگی تون شونداری ٹی پدی سلے۔ اوپارے کہ پاکستان اٹ کشت وکشار نا بشخ، انجینئرنگ و معدنیات اٹی انوسمنٹ  درکار ءِ، انویسمنٹ ہموتم آ بریک ہراتم اوفتے سیکورٹی دوئی مریک، پالیسی تا چرجوئی بھاز المی ءِ، سی پیک آ نن پاکستان نا شونداری چین ءِ لیز آ تتویسن، اگہ چین آن نن 29 ارب ڈالر پاکستان نا انفراسٹرکچر کن دوئی کرین تو 32 سد ارب پی ایس ڈی پی آن ہم خلکن، نن تھری جی و فورجی  ءِ لانچ کرین، نن ایچ ای سی نا کمک اٹ ہریونیورسٹی ٹی انوویشن سینٹر جوڑ کرسا ورناتے اسٹارٹ اپ نا کنڈآن درین، اینو پاکستان اٹ کنکٹویٹی نا انفراسٹرکچر ساڑی ءِ۔ اوپارے کہ سی پیک نا اسل فائدہ انڈسٹریل کوآپریشن ئس ہرانا رداٹ نہہ اکنامک زون جوڑ کروئی ئسک دا زون 2020 اسکان تیار مروئی ئسک اینو 2022 اٹی اسہ اکنامک زون اس ہم جوڑ اف۔