اسلام آباد۔ 17 جون (اے پی پی) وزیراعظم شہباز شریف بنجائی وزیر صنعت و پیدوار مخدوم مرتضیٰ محمود نا انڈونیشیا غان کنوئی آ تیل انا درآمد کن خصوصی کوشست آتا ستاءِ کرینے۔ جمعہ نادے آ وزیراعظم آفس نا میڈیا ونگ آن جاری بیان نا رداٹ وزیراعظم شہباز شریف تون وزیر صنعت و پیدوار مخدوم مرتضیٰ محمود و سیکرٹری امداد اللہ بوسال ئسک اوڑدہی کریر۔ وزیراعظم پارے کہ بنجائی وزیر نا کنوئی آ تیل انا درآمد کن جند انا خڑچہ غا انڈونیشیا نا دورہ ستاکڑزک، وخت آ درآمد آن ملک اٹی کنوئی آ تیل انا گمانی تنکی نا خطرہ نا سدباب مس، کنوئی آ تیل انا کارگونا آمد آن تیل انا نرخ آتیٹی کمتی مریک۔ وزیراعظم پارے کہ دا چرجوئی ٹی بنجائی وزیر صنعت و پیداوار و سیکرٹری نا کوشست آک ستاکڑزرہ۔ یات سلے کہ وزیراعظم نا پارت آ بنجائی وزیر صنعت و پیدوار مخدوم مرتضیٰ محمود کنوئی آ تیل انا درآمد کن جند انا خڑچہ غا انڈونیشیا نا دورہ ءِ کرے۔ دورہ نا مسخت ملک اٹی کنوئی آ تیل انا درآمد آن گمانی تنکی نا سدباب کننگ ئس۔ وزیر صنعت نا کوشست آتا سوب آن انڈونیشیا غان دونیم لکھ میٹرک ٹن (10بحری جہاز) کنوئی آ تیل پاکستان ءِ فراوان کننگ انگ ءِ۔ کنوئی آ تیل انا اولیکوکھیپ وزیر صنعت و پیدوار نا انڈونیشیا ٹی ساڑی گری ٹی پاکستان آ روانہ کننگاسس۔
