اسلام آباد۔ 17 جون (اے پی پی) امریکہ ٹی پاکستان نا سفیر مسعود خان امریکی محکمہ خارجہ ٹی انڈر سیکرٹری عذرازیا تون اوڑدہی کرے۔ واشنگٹن اٹی پاکستان نا سفارت خانہ نا کنڈآن جاری بیان نا رداٹ انڈر سیکرٹری پاکستان نا سفیر ءِ جم و جوش اٹ بخیر کرے، اوکان پد اوڑدہی ٹی پاکستان و امریکہ نا تعلقداری تے سوگو کننگ آ امنا کننگا۔ اوڑدہی ٹی فریق آک چندی بشخ آتیٹی تعلقداری و تین پہ تینی است خواہی نا امور آ گپ و تران کریر۔ امریکی انڈر سیکرٹری عذرازیا تینا ٹویٹ اٹی پاکستان نا سفیر مسعود خان تون تعمیری گپ وتران نا حوالہ ءِ ترسا اوغان ہمپ و بٹ نا عمل و باہوٹ آتیکن پاکستان نا اہم کڑد انا ستاءِ کرے۔ اوپارے کہ امریکہ پاکستان تون خڑکی شریداری نا خواہندار ءِ۔ مسعود خان پارے کہ ہڑتوم آ فریق آک پاک امریکہ تعلقداری تے مون آ دننگ و چندی بشخ آتیٹی ہڑتوم آ ملک آتا نیام اٹ خڑکی رابطہ استوار کننگ کن گپ وتران و کمکاری ءِ برجاتخرہ۔ اوڑدہی ٹی او انڈرسیکرٹری عذرازیا نادورہ پاکستان آ منت واری ءِ ہرفے۔ سفیر پاکستان مئی ٹی امریکی اسٹیٹ ڈیپارٹمنٹ نا کنڈآن او آئی سی ڈائیلاگ نا ہم ستاءِ کرے ہرا امریکہ و او آئی سی ملک آتا نیام اٹ خڑکی تعلقداری تے مون آ دیک۔ انڈرسیکرٹری عذرازیا مارچ انا تُو اٹی او آئی سی ۔ سی ایف ایم، وزراء خارجہ نا کونسل نا دیوان اٹی امریکہ نا نمائندگی کن پاکستان نا دورہ ءِ کریسس۔ انڈر سیکرٹری پاکستان و امریکہ نا نیام اٹ پائیدار تعلقداری و شریداری آ زور شاغا۔ او4 دہائی آن زیات وخت آن اوغان باہوٹ آتےشرف و رکھ فراوان کننگ آ پاکستان نا ستاءِ ہم کرے۔
