اسلام آباد۔ 17 جون (اے پی پی) بنجائی وزیر حوالکاری و شینکاری مریم اورنگزیب پارینے کہ عمران خان تینے بنی گالاٹی ڈکسا الس ءِ سڑک آتیا بٹنگ انگ ءِ، عمران خان الس ءِ برانز نا کال تف، تینا نالائخی و نابودی نا ماتن کے، الس چاہک کہ کبینی نا بھسکاری ءِ عمران خان ایس، آئی ایم ایف تون نزور بندا و تیا معاہدہ عمران خان کرسا ہنا، اینو ملک اٹی کبینی نا زموار ہم عمران خان ءِ، انشاء اللہ عمران خان نا کبینی نا لگفوک آ خاخر ءِ کسفنہ۔ جمعہ نادے آ تینا بیان اسے ٹی بنجائی وزیر حوالکاری پارے کہ عمران خان! الس منہ ہیرا، سد آ کنال ڈغار و مالی فائدہ غاتیکن قومی و السی فائدہ غاتیا سودا کروک آتون پیش تمپک ، الس دروغ، منافق، نالائخ و نابود تون پیش تمپک، نالائخ و نابود، دُز و آئین شکن آتا کال آ اسٹ اس ہم پیش تمپک۔ اوپارے کہ الس کبینی، بے روزگاری ، زرگزرانی بھسکاری نا زموار، خونی مارچ والا و سلہہ بند جتھ آتون پیش تمپک۔ الس بے گناہ پولیس والاتے سم اٹ خلسا شہید کروک آتون پیش تمپک۔ اوپارے کہ عمران خان کال تف، تینا اتوک آ کبینی و زرگزرانی بھسکاری نا زمواری نا اعتراف ءِ کرسا اللہ تعالیٰ و الس آن معافی خوائے۔ اوپارے کہ زرگزرانی بھسکاری و کبینی نا گند ءِ عمران خان تالان کرے، حکومت اوفتے ساف کننگ ءِ۔ بنجائی وزیر حوالکاری پارے کہ عمران خان سازش کرے کہ پاکستان ڈیفالٹ کے، حکومت ملک و الس ءِ بچفنگ کن بسنے۔ اوپارے کہ آئی ایم ایف تون معاہدہ کرسا اونا خلاف ورزی ءِِ کرے و پاکستان نا ساکھ ءِ خطرہ ٹی شاغا، اونا زموار عمران خان نی اُس۔
