اسلام آباد۔ 17 جون (اے پی پی) بنجائی وزیر جان جوڑی عبدالقادر پٹیل دورہ متحدہ عرب امارات اٹی دبئی نا شاہی خاہوت نا باسک شیخ حمد بن دلموک المختوم و اونا حیات بائیو ٹیک ٹولی نا عہدیدار آتون اوڑدہی کرے۔ جمعہ نادے آ جاری بیان نا رداٹ اوڑدہی تیٹی متحدہ عرب امارات اٹی پاکستان نا قونصل جنرل حسن افضل اسپیشل سیکرٹری ہیلتھ افتخار شلوانی ہم ساڑی ئسک۔ داوخت آ متحدہ عرب امارات حکومت نا چندی ٹیمک وزیر جان جوڑی و ڈل ءِ حوال تسر۔ اوڑدہی ٹی حیات بائیو ٹیک ٹولی اتون چندی بشخ آتیٹی کمکاری آ گپ وتران کریر۔ بنجائی وزیر عبدالقادر پٹیل ءِ پاننگاکہ متحدہ عرب امارات ، پاکستان اٹی پلازما نا تیاری و افزائش نا آسراتی تا ٹہیفنگ اٹ است خواہی تخک وخت اس کہ پاکستانی ڈل دا است خواہی نا ستاءِ کرے و تین پہ تینی کمکاری اتون دادے پین مون آ ودفنگ نا گرج آ زور شاغا۔ داوخت آ اودے متحدہ عرب امارات اٹی ڈیجیٹل و میڈیکل سائنس آتا شعبہ طبی پیش رفت نا بارواٹ ہم پاننگا۔ عبدالقادر پٹیل پارےکہ پاکستان و متحدہ عرب امارات نا نیام اٹ دیرینہ تعلقداری ءِ، دادورہ غان ہڑتوم آ ملک آتا نیام اٹ جان جوڑی نا بشخ اٹی اہم کمکاری بناکرینے۔ شاہی خاہوت نا ٹولی پاکستان اٹ سرکاری ہسپتال آتا اپ گریڈیشن اٹ بھاز است خواہی پاش کرے۔ بنجائی وزیر جان جوڑی پارے کہ داآسراتی الس ءِ براہ راست کمک فراوان کیک، ننا حکومت گچین طبی خذمت آتا آسراتی تا فراوانی کن سنبرینگوک ءِ۔ ہڑتوم آ ملک آتے جان جوڑی نا بشک اٹی کمکاری ءِ اواری اٹ مون آ دروئی مریک و ہر اسٹ ءِ دوئی تینا تینا چاہنداری و خذمت آتا شریداری ءِ مون آ دروئی ءِ۔ ننا حکومت جان جوڑی نا بشخ انا شونداری کن خصوصی گام گیج کننگ ءِ۔
