اسلام آباد۔ 17 جون (اے پی پی) چیئرمین سینیٹ محمد صادق سنجرانی پارت کرینے کہ آئی جی اسلام آباد زالبول صحافی نوشین یوسف تون داڑیلی نا واقعہ نا بابت دمدستی گام گیج کے و صحافی تا رکھ و ویل آتا ایسری کن ہر ممکن گام گیج کننگے۔ جمعہ نادے آ بڑزکو ایوان نا دیوان اٹی چیئرمین سینیٹ صادق سنجرانی پارت کرے کہ آئی جی پولیس صحافی نوشین یوسف تون داڑیلی نا واقعہ نا بابت دمدستی گام گیج کے و صحافی تا رکھ و ویل آتا ایسری کن ہرممکن گام گیج کننگے۔ وزیر مملکت کانود و انصاف سینیٹر شہادت اعوان پارے کہ صحافی تا آجوئی، بے کنڈہلوک و رکھ سلاہ درشانی کن صحافتی ادارہ و تنظیم تا سلابت اٹ پروٹیکشن آف جرنلسٹ بل 2021ء منظور مسنے۔ اوپارے کہ نوشین یوسف نا باندات آ اسلام آباد پولیس کارروائی کننگ ءِ، کروڑ لعل عیسن اٹی صحافی اختر عباس نا ایلم نا خون نا باندات نا سرجم معلومداری دوئی کینہ و کانود نا رداٹ کارروائی کننگک۔ داکان مست سینیٹر عرفان صدیقی ایوان ءِ معلومدار کرے کہ زالبول صحافی نوشین یوسف آ جلہو مس ، پرس و موبائل ءِ پُلنگ نا کوشست کننگا ہراٹی او ٹھپی ہم مس، ڈان انا صحافی اختر عباس نا ایلم لیہ ٹی قتل مس، دا خونی تا ڈس و نشان ءِ خلنگ نا ہچ ءُ کوشست اس کپننگ انگ ءِ، نعیم نفیس ءِ اُراغان ہرفنگا، ولدا سلامتی اٹ پدی بس، سینئر صحافی تتون انت اس کہ مرسا کرے او نما مون آٹے، جرنلسٹ پروٹیکشن بل ایکٹ نا دروشم اختیار کرینے، دا بھاز بھلو ویل اسے، صحافی بھاز مشکل حالیت اٹ کاریم کیک، کیہی کیہی تُو اوفتے تنخواہ ملپک ولے اوفتا جان و مال اکن ویل و مشکل ارے ، اوفتا ویل آتے ایسر کننگ ننا زمواری ءِ۔ سینیٹر اعظم سواتی پارے کہ صحافی تے ہروڑنا پروٹیکشن تننگ ننا کانودی و آئینی زمواری ءِ۔
