اسلام آباد۔ 17 جون (اے پی پی) قومی اسمبلی نا حلقہ این اے 240 کراچی ٹی ضمنی گچین کاری تیٹی متحدہ قومی موومنٹ پاکستان نا اومیتدار محمد ابوبکر 10 ہزار 683 وونٹ دوئی کرسا سرسہب گوندنگا، حلقہ ٹی پولنگ نا کچ 8.38 درسد ئسک۔ ریٹرننگ آفیسر آتا کنڈآں جاری کروک غیر حتمی نتیجہ غاتا رداٹ این اے 240 اٹی کل 25 اومیتدار ضمنی گچین کاری تیٹی بشخ ہلکر ہراٹی سخت مقابلہ غان پد ایم کیو ایم پاکستان نا اومیتدار محمد ابوبکر سرسہب مس، اونا خڑک انگا حریف تحریک لبیک پاکستان نا اومیتدار شہزادہ شہباز ئس ہرا10618 وونٹ دوئی کرے، مہاجر قومی موومنٹ نا اومیتدار رفیع الدین 8383 وونٹ دوئی کننگ کرے۔ پاکستان پیپلزپارٹی پارلیمنٹرینز نا اومیتدار ناصر رحیم 5248 وونٹ دوئی کرے۔ پولنگ اٹی چندی پولنگ اسٹیشن تیا پرتشدد واقعہ غاتیٹی اسہ بندغ اس زوال و چندی ٹھپی مسر۔ ہرانا الیکشن کمیشن سخت نوٹس ءِ ہلسا تعلقدار کمامدار آتیان رپورٹ بٹنگانے۔
