اسلام آباد۔ 16 جون (اے پی پی) وزیراعظم شہباز شریف سکھر حیدر آباد موٹروے و قراقرم ہائی وے (تھاہ کوٹ رائے کوٹ سیکشن )، بابو سرٹنل و خضدار کچلاک روڈ آ کاریم نا زوت بناءِ کننگ نا پارت کرسا پارینے کہ ڈٹ آتیکن کنٹریکٹ تننگ نا وڑوڈول ءِ پین شفاف جوڑ کننگے، تدوک آ چارسال اٹی شونداری نا سفر ءِ مجرمانہ ڈیوالئی ٹی توننگا، جہانی کمپنی تا پک کننگ کن پاکستانی سفارت خانہ غاتیان کمک دوئی کننگے، ملک شونداری ڈٹ آتیٹی پین تعطل ءِ سگنگ کپک، اوداخیال آتا درشانی ءِ پنچ شنبے نادے آ داڑے نیشنل ہائی وے اتھارٹی نا برجا شاہراہ تا تعمیراتی ڈٹ آتیا پیش رفت نا جاچ دیوان نا کماشی ءِ کرسا کرے۔ دیوان اٹی بنجائی وزیر احسن اقبال، مولانا اسعد محمود، وزیراعظم نا سلاہکار احد چیمہ، چیئرمین این ایچ اے و تعلقدار بڑزکو کمامدارآک بشخ ہلکر۔ وزیراعظم دیوان اٹی پروکیورمنٹ نا وڑوڈول ءِ گچین کننگ کن کمیٹی نا جوڑ کننگ نا منظوری ءِ تس و پارے کہ تعلقدار ادارہ غاتا زمواری ءِ کہ ملک و قوم نا وخت و پیسہ غاتے بچفنگ نا ہرممکن کوشست کیر۔ وزیراعظم ءِ سکھر حیدر آباد موٹروے ڈٹ آتا بابت سرجمی اٹ معلومدار کننگا، دیوان ءِ پاننگاکہ ایم سکس سکھر حیدر آباد موٹروے کراچی پشاور موٹروے نا اہم سیکشن ءِ ہراڑآ کاریم تدوک آ حکومت نا سست روی نا سوب آن تعطل نا گواچی مس، 306کلومیٹر مرغن شش رویہ موٹروے 15 انٹرچینج آتون 6 ضلع غاتیان گدرینگک، موٹروے نا جوڑ کننگ آن سفر نا وخت کم مننگ تون اوار اوار ایندھن نا بچت و مچ آ پاکستان آن برآمد آتا کراچی بندرگاہ تسکان رسینگ اٹ آسانی ودی مریک، ڈٹ آ کاریم شش تُو انا تہہ ٹی بناکننگک ہرا2.5 سال اٹی پورو مریک، 250 کلومیٹر قراقرم ہائی وے (تھاہ کوٹ رائے کوٹ سیکشن ) نا بابت دیوان ءِ پاننگاکہ اونا فزیبلٹی رپورٹ آ کاریم برجاءِ ہرادے 7 تُو اٹی پورو کننگک ہراڑآن پاکستان و چین نا نیام اٹ واپاری ٹریفک نا ہن و بر اٹ آسانی ، و داسو و دیامربھاشا ڈیم تا تفنگ نا سوب آن گیگ بدل کسر اس دُوبریک۔ بابو سرٹنل نا بابت دیوان ءِ پاننگاکہ ٹنل آن بیدس 66 کلومیٹر روڈ انا پورو سیکشن تعمیر و ساڑی روڈ انا بحالی نا کاریم ءِ کننگک، شاہراہ نا دا بشخ اٹی سیل انا برف اٹی ٹریفک نا بے سلنگ آن روانی کن سنوگیلری ہم تفنگک، وزیراعظم داڈٹ ءِ قطبی علاقہ غاتیٹی سیل و سوات نا مون آ دننگ کن بھاز اہم گوندسا جہانی آب انا رداٹ ڈٹ انا پوروی نا پارت جاری کرے۔ وزیراعظم ءِ پروکیورمنٹ نا وڑوڈول انابابت ہم سرجمی اٹ معلومدار کننگا، وزیراعظم پروکیورمنٹ نا وڑوڈول ءِ گچین و جوان جوڑ کننگ کن جامع سلاہ شین تننگ کن 9 باسکی کمیٹی اس جوڑ کرے، کمیٹی ٹی بنجائی وزیر مواصلات ، وزیر ہاؤسنگ، ایم ڈی پیپرا، چیئرمین پی ای سی اوار مریرہ، وزیراعظم کمیٹی ءِ اسہ تُو انا تہہ ٹی لائحہ عمل اس پیش کننگ نا پارت کرے۔
