اسلام آباد۔ 16 جون (اے پی پی) وزیراعظم شہباز شریف پارینے کہ مسکوہی حکومت آئی ایم ایف تون داتم اسکان نا بدترین معاہدہ کرے، پیٹرولیم مصنوعات آتا نہاد آتیٹی ودکی آن الس نا زہمی مننگ نا احساس ارے ولے داکان بیدس پین ہچ ءُ چارہ اس الوکہ، حالیت آتیا قوم ءِ زوت پت اٹ ہلیوہ۔ پنچ شنبے نادے آ تینا ٹویٹ اٹی وزیراعظم شہبازشریف پارے کہ ای پیٹرولیم مصنوعات آتا نہاد آتیٹی ودکی آن الس آ تموک آ اثرآتیان جوانی اٹ معلومدار اُٹ ولے پی ٹی آئی نا مسکوہی حکومت و آئی ایم ایف ناڈیل انا سوب آن ساڑی حکومت تون پیٹرولیم مصنوعات آتا نہاد آتے ودفنگ آن بیدس پین ہچ ءُ چارہ اس الوکہ۔ وزیراعظم پارے کہ او پی ٹی آئی نا حکومت و آئی ایم ایف نا نیام اٹ مروک آ ڈیل انا بارواٹ قوم ءِ زوت پت اٹ ہلیک۔ وزیراعظم پارے کہ انشاء اللہ نن اقتصادی مشکل آتیان پیش تمنہ۔ وزیراعظم حیرانی نا درشانی ءِ کرے کہ ہرافک آئی ایم ایف تون داتم اسکان نا بدترین معاہدہ کریر و بھاز غلط زرگزرانی فیصلہ کریر، انت او سچ اتون مون تننگ نا ہمت تخرہ ؟، اوپارے کہ قوم داوخت آ ہرا زرگزرانی مشکل آتیان گدرینگ انگ ءِ ، اونا زموار تینے امر بری الزمہ گوندنگ کیک۔ اوپارے کہ او مسکوہی پی ٹی آئی حکومت و آئی ایم ایف نا بارواٹ قوم ءِ زوت پت اٹ ہلینہ۔
