اسلام آباد۔ 16 جون (اے پی پی) بنجائی وزیر حوالکاری و شینکاری مریم اورنگزیب تون متحدہ عرب امارات نا سفیر حماد عبید ابراہیم الزابی اوڑدہی کرے۔ ہڑتوم آ راہشون تیٹی پاکستان و یواے ای نا نیام اٹ ہڑتوم آ کنڈآتا تعلقداری تا مون آ دننگ و تین پہ تینی است خواہی نا امور آ گپ وتران مس۔ بنجائی وزیر حوالکاری مریم اورنگزیب پاکستانی الس نا کنڈآن متحدہ عرب امارات نامسکوہی صدر شیخ خلیفہ بن زید النہیان نا کزیت آ است ہسونی نا درشانی ءِ کرسا پارے کہ شیخ خلیفہ ایماندار پاکستان نا سنگت ئس، اونا کزیت ہڑتوم آ ملک آتیکن بھلو نسخان اسے۔ بنجائی وزیر حوالکاری پارے کہ یواے ای نا پوسکن آ صدر شیخ محمد بین زید بن سلطان النہیان وژنری و شون پسند لیڈر اسے۔ اوپارے کہ وزیراعظم شہباز شریف و صدر شیخ محمد بن زید بروک آ چین تا شونداری و شونہالی نا انقلابی وژن اس تخرہ۔ ہڑتوم آ سرکڑدہ غاک ہڑتوم آ ملک آتا نیام اٹ زرگزرانی، واپاری، راجی تون اوار تین پہ تینی است خواہی نا غٹ بشخ آتیٹی سوگو تعلقداری ورابطہ غاتا مون آ دننگ نا خواہندار ءُ۔ اوپارے کہ ننا حکومت پوسکن آ فلم و کلچر پالیسی آ عمل نا بناءِ کرینو۔ یو اے ای اے نا فلم ساز و زرکار آتے فلم و راگ انا بشخ آتیٹی اسیجائی ڈٹ آتیٹی زرکاری نا سلہ خلینہ۔ مریم اورنگزیب دوبئی ایکسپو نا سرسہب اڈتننگ آ یواے ای نا سرکڑدہ و آرگنائزر ءِ مبارکبادی ترسا پارے کہ دوبئی نمائش آن مثبت دروشم ءِ تالان کننگ آن بیدس زرگزرانی وارخواہی تیٹی ودکی مس و چندی ملک آتا دودوربیدگ ءِ مون آ دننگا۔ اوپارے کہ وزیراعظم شہباز شریف نا وژن نا رداٹ واپار و بزنس ٹو بزنس رابطہ غاتے پین سوگو کننگ نا خواہندار اُن۔ متحدہ عرب امارات نا سفیر مریم اورنگزیب ءِ وزارت حوالکاری نا منصب ءِ سنبھالنگ آ مبارکبادی ترسا پارے کہ ہڑتوم آ ملک آتا سرکڑدہ غاتا وژن نا رداٹ ہڑتوم آ کنڈآتا تعلقداری تے پین مون آ دننگ آ یخین تخنہ۔
