اسلام آباد ۔ 16 جون (اے پی پی) سینیٹ اٹی اپوزیشن آن تعلق تخوک آ باسک آک پارینو کہ ننے ملکی زرگزران ءِ تینا نت تیا سلفنگ کن خڑچ آتیٹی کمتی اتوئی مریک، پیٹرولیم مصنوعات آتا نہاد آتیٹی ودکی آن کبینی نا پوسکن ءُ طوفان اس بریک۔ پنچ شنبے نادے آ بڑزکو ایوان نا دیوان اٹی پیٹرولیم مصنوعات آتا نہاد آتیٹی ودکی و بروک آ مالی سال 2022-23ء نا بجٹ آ شرہ ٹی بشخ ہلسا سینیٹر مشتاق احمد پارے کہ تدوک آ 20 دے ٹی پیٹرول نا نہاد اٹی 84 روپئی و ڈیزل نا نہاد اٹی 120 روپئی نا ودکی کننگانے، نن دا ودکی ءِ مسترد کینہ، چارسد گڑاتا نہاد آتیٹی ودکی مننگ ءِ ، ای سی سی بجلی نا نہاد اٹی 13 روپئی فی یونٹ ودکی نا منظوری ءِ تسنے ، داڑآن ملک اٹی کبینی ہراکان ہراڑے سرمریک، لس بندغ نا زند ژند مسنے۔ سینیٹر دوست محمد پارے کہ کبینی نا زموار تحریک انصاف نا حکومت آخا، مستین نا حکمران آک ئسر، ننے ملک ءِ تینا نت تیا سلفنگ کن خڑچ آتیٹی کمتی اتوئی مریک ۔ سینیٹر شبلی فراز پارے کہ ساڑی بجٹ آئی ایم ایف نا مرضی نا رداٹ جوڑ کننگانے، بجٹ اٹ ہچ ءُ دُن ءُ اولیت متعین کننگتنے ہراڑآن ننا زرگزران ءِ فائدہ رسینگ ءِ۔ سینیٹر اعجاز چوہدری پارے کہ غریب بزغر، دیہاڑی دار مزور و طالب علم غٹ بجٹ و پیٹرولیم مصنوعات تا نہاد آتیٹی ودکی آ فریشان ءُ، مخلوق نا مالی مشکل آک ودنگ ءُ، پیٹرولیم مصنوعات آتا نہاد آتیٹی ودکی آن پد غٹ گڑاتا نہاد آک ودرہ و کبینی نا پوسکن ءُ طوفان اس بریک۔
