اسلام آباد۔ 16 جون (اے پی پی) سینیٹ اٹ حکومت آن تعلق تخوک آ باسک آک پارینو کہ ملک ءِ داوخت مشکل حالیت مون تروک ءِ و ساڑی حکومت ساڑی حالیت آتیٹی جوان ءُ بجٹ اس پیش کرینے، تعلیم نا بجٹ اٹ بایدے ودکی مرے، آفیسر آتا نسبت چنکا سرکاری ملازم آتا تنخواہ تیٹی ودکی ءِ بایدے اولیت تننگے ، ننے ملکی زرگزران ءِ تینا نت تیا سلفنگ و آئی ایم ایف نا وام تیان نجات کن وڈی خوری نا مون ءِ توروئی مریک ۔ پنچ شنبے نادے آ بڑزکو ایوان نا دیوان اٹی پیٹرولیم مصنوعات آتا نہاد آتیٹی ودکی و بروک آ مالی سال 2022-23نا بجٹ آ شرہ ٹی بشخ ہلسا سینیٹر عرفان صدیقی پارے کہ پاکستان بدبختی اٹ 75 سال اٹ سہی کنڈآ ہِننگ کتو، تحریک انصاف نا حکومت دا اومیت آتیا پورو سلتو ہراڑکن او اتنگاسس، مستین اٹ ہرافصل آتے دسنگا اگہ او میوہ تسرہ تو ملک داوڑنا حالیت آتیان دوچار متوکہ۔ اوپارے کہ مسکوہی حکومت نا چٹفنگ کن سازش نا ہیت ءِ کننگک، سمااف داسازش ہراڑے مس و امر مسنے، سازش تو شہید ذوالفقار علی بھٹو نا برخلاف مسوسس، ہرادے تختہ دار آ لگفنگا، سازش تو لیاقت علی خان و بےنظیر بھٹو نا برخلاف مسوسس ہرافتے شہید کننگا۔ اوپارے کہ ملک ءِ داوخت آ مشکل حالیت مون تروک ءِ و حکومت ساڑی حالیت آتیٹی جوا ن ءُ بجٹ اس پیش کرینے ولے تعلیم کن بجٹ جی ڈی پی نا بیرہ 1.77 درسد تخنگانے ہرابھاز کم ءُ، ایچ ای سی نا بجٹ 64 آن 65 ارب روپئی ءِ ہراڑآن یونیورسٹیک تینا گرج آتے ہم پورو کننگ کپسہ ، نیب کون آ ہمو ادارہ غاک ہرا زرگزران ءِ خورک کننگ ءُ، اوفتا بجٹ ءِ کم کرسا تعلیم کن فنڈ تننگے۔ او سلاہ تسر کہ تعلیم کن 5،6 ارب روپئی نا اسہ کمکی فنڈ اس بایدے جوڑ کننگے ہراٹی ننا صنعت کار و ایلو صاحب ثروت مخلوق ہم مالی کمک کیر۔ اوپارے کہ بڑزکو آفیسر و سرکاری ملازم آتا تنخواہ تیٹی 15 درسد نا اسہ وڑ ودکی کننگانے، آفیسر آتا تنخواہ تو مہالو آن لکھ آتیٹی مریک، اوفتے 15 درسد ودکی آن پین زیات فائدہ مریک، چنکا ملازم آتے اوفتا تنخواہ ٹی ودکی نا داخہ فائدہ مفک، تنخواہ تیٹی ودکی ٹی چنکا ملازم آتے زیات اولیت تننگے۔ سینیٹر طاہر بزنجو پارے کہ مشکل حالیت آتیٹی بروک آ مالی سال انا بجٹ اسہ متوازن ءُ بجٹ اسے، آئی ایم ایف نا شڑت آک نیزگار ملک آتیکن تباہی نا سوب مریرہ، ننے ملک ءِ تینا نت تیا سلفنگ و آئی ایم ایف نا وام تیان نجات کن وڈی خوری نا مون ءِ توروئی مریک، صنعتی و کشاری بشخ ءِ شون تروئی مریک۔ اوپارے کہ بلوچستان قدرتی وسیلہ غاتیان شپ ءِ ولے ہموجاگہ نا الس اٹ بھاز احساس محرومی ءِ، بنجائی حکومت بلوچستان نا شونداری آ خاص چکار کے۔ اوپارے کہ پرویز مشرف نا بابت کانودی خواست آک بایدے پورو مریر ۔ سینیٹر مولانا عطاء الرحمان پارے کہ عمران خان نا دور اٹی کرپشن کاٹم آن گدرینگا، توشہ خانہ نا گھڑی و چلوآتسکان سودا کننگا، ملک ءِ زرگزرانی بھسکاری نا کنارہ اسکان سرکننگا، ڈیم تا ہیت ءِ کینہ ولے اونا دور اٹی اسہ ڈیم اس ہم جوڑ متو ہراڈیم تا کریڈٹ ءِ ہلنگ ءِ، اوفتا کاریم تدوک آ حکومت آتا دور اٹی بناکریسس۔
