اسلام آباد۔ 16 جون (اے پی پی) چیئرمین سینیٹ محمد صادق سنجرانی پارینے کہ پاکستان پیپلزپارٹی نا سینیٹر ڈاکٹر سکندر میندھرو نا داسکان تدفین متنے، الیکشن کمیشن اونا نشست آ الیکشن شیڈول جاری کرینے ، داالیکشن شیڈول ءِ پدی یا ملتوی کننگے۔ پنچ شنبے نادے آ بڑزکو ایوان نا دیوان اٹی قائد حزب اختلاف سینیٹر ڈاکٹر شہزاد وسیم پارےکہ ڈاکٹر سکندر میندھرو نا داسکان تدفین ہم متنے کہ الیکشن کمیششن اونا نشست آ الیکشن کن شیڈول جاری کرینے و اینو آن پندار کاغد آتے ہم ہلنگ انگ ءِ۔ سینیٹر بہرہ مند تنکی پارے کہ ہراتم اسکان نشست ءِ خورک گوندنگپ شیڈول بایدے جاری مفروسس۔ سینیٹر مشتاق احمد پارے کہ الیکشن کمیشن تینا مینڈیٹ آن تجاوز کرینے۔ سینیٹر اعجاز چوہدری پارے کہ الیکشن کمیشن آن اپیل کننگ کپنہ انتئے کہ او تو اسہ اپیل اسے آہم خف توپک، الیکشن کمیشن تینا زمواری تے پورو کریکہ تو پنجاب اٹی داوڑنا حالیت متوکہ۔ سینیٹر اعظم سواتی پارے کہ ڈاکٹر سکندر میندھرو نا جہہ جاگہ کننگ آن پد الیکشن شیڈول بایدے جاری مروسس۔ سید یوسف رضاگیلانی پارے کہ ننا پارٹی نا باسک ئس، ننے شیڈول آ ہچ ءُ اعتراض اس اف، ادارہ غاتیا تنقید کننگپ، اولیکو وار وزیراعظم اسے نا برخلاف تحریک بے پتی سرسہب مس، شہید بے نظیر بھٹو نا برخلاف پیش مروک آ تحریک بے پتی ءِ نن بے سہب کریسن۔
