اسلام آباد۔ 10 جون (اے پی پی) بنجائی حکومت بروک آ مالی سال 2022-23ارب روپئی کچ انا بنجائی بجٹ ءِ پیش کرے ہراٹی ابترحال زرگزران ءِ سوگو کننگ و راج انا نزور تپہ غاتا مشکل آتے کم کننگ آ چکار کننگانے، لس بندغ آ ہچ ءُ پوسکن ءُ خراج اس خلنگتنے، تنخواہ تیٹی 15 درسد ودکی، انکم خراج نا کم آن کم کچ 6 لکھ روپئی آن ودفسا 12 لکھ روپئی کننگانے، کابینہ و سرکاری کارندہ غاتیکن پیٹرول نا حد ءِ 40 درسد کم کننگانے، ایلو ملک آتیانبار پنشن فنڈ اس جوڑ کننگانے، بروک آ مالی سال انا شرح نمو 5 درسد تخنگانے ، جی ڈی پی ءِ 67 کھرب آن ودفسا 78 کھرب روپئی کننگ انگ ءِ، افراط زر انا کچ انا ہدف 11.7 درسد آن کم کرسا 11.5 تخنگانے، کشاری ازباب، سولر، خولم ، مکئی ، کینولا، روش گڑدان، برنج تون اوار چندی اجناس آتا بج آتیا کسٹم و سیلز خراج ءِ چٹفنگانے۔ جمعہ نادے آ قومی اسمبلی ٹی بروک آ مالی سال انا بجٹ ءِ پیش کرسا وزیر خزانہ مفتاح اسماعیل پارے کہ بجٹ 2022-23 شونداری نا بجٹ اسے ہرانا بنداوآ آخبت اٹ شونداری والا بجٹ جوڑ مریک۔ تنخواہ دار تپہ غا بھاریم ءِ کم کننگ کن انکم خراج نا کم آن کم حد 6 لکھ آن ودفسا 12 لکھ کننگانے۔ وزیر خزانہ پارے کہ فلمی صنعت نا بحالی و فنکار آتا کمک کن گام گیج کرینن تانکہ فلم و سینما شون ہلیر۔ دنیا ٹی پاکستان نا کلچر و مثبت دروشم ءِ تالان و ملک اٹی سیل و سوات مون آ کائے۔ ورناک ننا آخبت و نہادی میرات ءُ ہرافتیکن بھلو و پبی گام گیج کننگ انگ ءِ۔ 40 ہزار سالانہ غان کم کٹیا والا پاکستانی تے نغد زر تننگک۔ بے نظیر انکم سپورٹ پروگرام اٹ بھلو ودکی اس کننگ انگ ءِ تانکہ نیزگاری تون مون تننگ مرے۔ بے نظیر وظیفہ غاتیٹی 1 کروعڑ پین طالب علم آتے اوار کننگ انگ ءِ تانکہ اوفتے زیور تعلیم آن آراستہ کننگے۔ اوپارے کہ ودکی زر فراوان کرسا سی پیک نا ڈٹ آتیا کاریم نا رفتار ءِ ترند کننگک۔ سی پیک نا رداٹ اسپیشل اکنامک زون تا زوت بناغا خصوصی چکار کننگک۔ آئی ٹی، کشت وکشار، غذائی رکھ، قابل تجدید توانائی، تعلیم و ورناتا کٹیا کن ٹیکس استثنیٰ تننگ انگ ءِ۔ اوپارے کہ غیر پیدواری و پرتعیش نا زمرہ ٹی بروک آ گڑاتیان سرمایہ ءِ پیدواری میرات و بشخ آتا کنڈآ گدریفنگ انگ ءِ۔ ہزگار آتا دولت نا رخ ءِ نیزگار آتا کنڈآ کننگ انگ ءِ۔ دا برآمدات و زرکاری ءِ ودفوک آ بجٹ ءِ ، بڑزکو تعلیم نا مون آ دننگ کن ایچ ۔ای ۔سی نا بجٹ اتی تدوک آ سال انا مقابلہ ٹی 67 درسد ودکی کننگ انگ ءِ، بلوچستان نا طالب علم آتے 5 ہزار تعلیمی وظیفہ تننگک۔ بلوچستان نا کرکی علاقہ غاتیان تعلق تخوک آ طالب علم آتے ودکی تعلیمی وظیفہ ایتنہ۔ بلوچستان نا تعلیمی بشخ ءِ گچین تعلیمی سازو سامان مہیا کننگک، صنعت آتے چلیفوک آ فیڈر آتیا صفر لوڈشیڈنگ مریک۔ اوپارے کہ چنکاکاروبار خاص وڑاٹ کاروباری زالبول آتیکن کم از کم خراج بریکٹ 4 لکھ آن 6 لکھ کننگ انگ ءِ۔ سیونگ سرٹیفکیٹ (بچت اسکیم) پینشن فائدہ، شہید آتا خاہوت آتا راجی آسراتی نا کھاتہ غاتیتی زرکاری آ منافع غا لگوک خراج ءِ 10 درسد آن کم کرسا 5 درسد کننگ انگ ءِ۔ وزیر خزانہ پارے کہ 3 ہزار آن ہلیس 10 ہزار اسکان نا متعین (فکسڈ) آمدن و سیلز خراج نا نظام اس لاگو کننگ اُن اوکان پد ‘ایف ۔بی۔آر’ دافتیان پین خراج نا خواست کپک۔ اولیکو سال اکن صنعت و کاروباری قدر (ڈپیریسی ایشن کاسٹ) اٹی کمتی ءِ 50 درسد آن بدل کرسا 100 درسد کننگ انگ ءِ۔ اوپارے کہ ریئل اسٹیٹ تون اوار غیر پیداواری میرات آتے جمع کننگ آن نیزگار آتیکن اُراتا نہاد ودک۔ ہزگار آتا غیر پیداواری میرات آتیا خراج خلنگ اُن تانکہ توازن بننگ آن نیزگارآتیکن جائیداد آتا نہاد آتیٹی کمتی مرے۔ دونیم کروڑ مالیت نا ارٹ میکو جائیداد نا ہلنگ آ 5 درسد خراج عائد کننگ انگ ءِ۔ سرکاری ملازم آتا تنخواہ تیٹی ودکی کننگ انگ ءِ۔ 1600 وداکان زیات سی سی نا لگژری گاڈی تیا خراج اٹی ودکی کننگ انگ ءِ۔ سولر پینل نا درآمد و ترسیل (ڈسٹری بیوشن ) آ خراج ءِ صفر کننگ انگ ءِ۔ اوپارے کہ کشاری مشینری، ٹیکٹر، خولم، برنج، بج اتون اوار دا بشخ اٹی کاریم اٹ اتوک آ ایلو گڑا و اوفتا فراوانی آ خراج صفر کننگ انگ ءِ۔ کشاری مشینری ءِ کسٹم ڈیوٹی آن استثنیٰ تننگ انگ ءِ۔ کشاری بشخ انا مشینری ، اوڑتون منسلکہ گڑا، گرین ہاؤسنگ فارمنگ، پراسیسنگ ، نیال آتے بچفنگ نا ازباب، ڈرپ اریگیشن ، فراوانی آب اتون اوار ہر وڑنا کشاری ازباب آتے خراج آن استثنیٰ تننگ انگ ءِ۔ دااولیکو وار ءِ کہ خراج ءِ صفر کرسا داخہ بھلو گام اس ہرفنگانے تانکہ ننا کشت وکشار و بزغر شون ہلے۔ وزیر خزانہ پارے کہ چاگڑدی بدلی تون مون تننگ کن بجٹ اٹی 10 ارب روپئی تخنگ انگ ءِ، ویکسین، مرض آتا مون ءِ توننگ و جان جوڑی نا بابت ادارہ غاتا کچ ءِ ودفنگ کن 24 ارب روپئی بجٹ اٹ تخنگانے۔ کسٹم کوڈ ءِ جوان کننگ و ٹیرف اٹ کمتی کننگ انگ ءِ۔ اوپارے کہ دوائی جوڑ کننگ اٹ کاریم اٹ اتوک آ گڑاتے کسٹم ڈیوٹی آن پورو استثنیٰ تننگ انگ ءِ ہراٹی دوائی جوڑ کننگ اٹ کاریم اٹ اتوک آ چندی وڑنا بنداوی مواد آک اوار ءُ۔ اوپارے کہ عدالت آتیان پیشن جھیڑہ و مقدمہ غاتے طے کننگ کن مقدمہ غاتا تصفیہ نا گیگ بدل نظام اس بناکننگ انگ ءِ تانکہ مقدمہ بازی آ مروک آ خڑچ و وخت ءِ بچفنگ آن بیدس بروک آ مشکل آتے مر کننگے۔
