اسلام آباد۔ 10 جون (اے پی پی) وزیراعظم شہباز شریف پارینے کہ گوادر نا مخلوق ءِ بنداوی آسراتی تا فراوانی اسکان آرام اٹ تولپنہ، اُرائی صارف آتے سولر پینل آتا فراوانی بنجائی حکومت نا گوادر نامخلوق ءِ ٹیکی اس مریک، دا بابت 10 دے انا تہہ ٹی لائحہ عمل اس پیش کننگے، ڈٹ آتا پوروی ٹی ہرے ءِ امنا کپنہ۔ وزیراعظم آفس نا میڈیا ونگ آن جاری بیان نا رداٹ داخیال آتا درشانی ءِ او جمعہ نادے آ تینا کماشی ٹی بلوچستان اٹی بجلی نا ٹرانسمیشن لائن تیا پیش رفت نا جاچ دیوان آن تران کرسا کرے۔ دیوان اٹی بنجائی وزیر احسن اقبال، انجینئر خرم دستگیر، ڈی جی ایف ڈبلیو او میجر جنرل کمال اظفر و تعلقدار بڑزکو کمامدارآک بشخ ہلکر۔ دیوان اٹی جیونی، گوادر، پسنی ، اورماڑا، پنجگور و ایران نا نیام اٹ بجلی نا ٹرانسمیشن لائن تا جوڑ کننگ آ سرجم حوال تننگا۔ حوال اٹی دیوان ءِ پاننگاکہ ٹرانسمیشن لائن تا بابت گونڈ مدتی و مریس مدتی ڈٹ آتا بناءِ کننگ انگ ءِ۔ شش تُو اناتہہ ٹی حکومت گوادر ءِ ایران آن پین 100 میگاواٹ بجلی فراوان کننگ کیک۔ داڑآن بجلی نا جم فراوانی 260 میگاواٹ وخت اس کہ کھپت 236 میگاواٹ مریک، پین دا کہ خضدار پنجگور ٹرانسمیشن لائن نا دسمبر 2022اٹی پوروی آن پد 90 میگاواٹ نا سسٹم اٹی پین ودکی مریک و دا ڈٹ آ ہم کاریم ترندی اٹ برجاءِ۔ داکان بیدس حب اورماڑا ٹرانسمیشن لائن نا فزیبلیٹی تیاری نا ریسہ غاتیٹی ءِ۔ دا ٹرانسمیشن لائن نا پوروی آن پد پین 200 میگاواٹ سسٹم ءِ فراوان کننگک۔ داوخت آ وزیراعظم ڈٹ آتیٹی شفافیت اتنگ نا پارت کرینے۔ وزیراعظم پارے کہ اُرائی صارف آتے سولر پینل آتا فراوانی بنجائی حکومت نا گوادر نا مخلوق ءِ ٹیکی اس مریک۔ دا بابت 10 دے انا تہہ ٹی لائحہ عمل اس پیش کننگے۔ وزیراعظم پارت کرے کہ گوادر اٹی بجلی نا فراوانی کن دمدستی وڑاٹ آف گریڈ نظام نا ہم جوان لائحہ عمل اس جوڑ کننگے۔ گوادر اٹی آف شور و آن شور ونڈ پاور ڈٹ آتیکن ہم حکمت عملی اس جوڑ کننگے۔ سویلی بلوچستان اٹی ٹرانسمیشن لائن تا کاریم اٹ ترندی اتسا اودے اینخو دسمبر اٹ پورو کننگے۔ وزیراعظم پارے کہ ڈٹ آتا پوروی ٹی ہرے ءِ اسُل منپنہ۔ تعلقدار محکمہ غاک پک کیر کہ مریس مدتی ڈٹ آتیٹی ہم وخت و خڑچ اٹی اخہ در مننگ کے کمتی اتنگے۔ حکومت نا زمواری مریک کہ او الس نا پیسہ غاتا بچت کے و اوفتا سہی کاریم اٹ اتنگ ءِ پک کے۔ گوادر بندرگاہ ءِ دنیا نا پوسکن آ بندرگاہ جوڑ کننگ کن بے سلنگ آن بجلی نا فراوانی ءِ پک کننگک۔ گوادر نا مخلوق ءِ بنداوی آسراتی تا فراوانی اسکان آرام اٹ تولپنہ۔
