اسلام آباد۔ 10 جون (اے پی پی) ترجمان دفترخارجہ عاصم افتخار پارینے کہ بھارت مسلمان و ایلو اقلیت آتا برخلاف پبی مہم ءِ برجاتخانے، توہین آمیز ہیت آتیا باندات آتیا بھارتی ناظم الامور ءِ بٹنگسا ترند برانز ریکارڈ کرفنگا، بھارت پین اسے آخا بلکن تینے بیوقوف جوڑ کننگ ءِ، بھارت کشمیر اٹی ظلم ءِ بند کرسا ہموڑے دمدستی اقوام متحدہ نا چاروکی ٹی آجو استصواب رائے کرفے۔ او جمعہ نادے آ دفتر خارجہ ٹی میڈیا ءِ ہفتہ وار حوال تسکہ۔ ترجمان دفترخارجہ عاصم افتخار پارے کہ بھارتی بی جے پی نا اِرا کمامدارآتا کنڈآن توہین آمیز ہیت، ہندو توا نا مون آ دننگ و اقلیت آتیا بھارتی ظلم آن معلومدار کرے۔ اگہ بھار ت اٹی زرس ہم اخلاقی جیرت ارے تو او دمدستی وڑاٹ دا بی جے پی کمامدارآتا بیان تا مذمت ءِ کے۔ بھارت دا کمامدار آتے سزاایتے۔ اوپارے کہ پاکستان مذہبی ہم آہنگی و رواداری ءِ مون آ دننگ ءِ۔ پاکستان 6 سد آن زیات سکھ یاتری تے مقدس ہند آتا یاتراکن ویزہ جاری کرے۔ اوپارے کہ جرمن وزیر خارجہ انالینا بیئر بوک پاکستان نا دورہ ءِ کرے، بدبختی اٹ کورونا ٹیسٹ مثبت بننگ نا سوب آن جرمن وزیر خارجہ ءِ دورہ ءِ گونڈ کروئی تما۔ اوپارے کہ ایرانی سفیر اوڑدہی کرے۔ وزیراعظم بلوچستان اٹ لگوک آ خاخر ءِ کسفنگ اٹ ایران نا کمک آ منت واری ءِ ہرفے۔ اوپارے کہ تدوک آ دے وزارت خارجہ و آذربائیجان نا سفارت خانہ نا کنڈآن اسیجائی دود اس اڈتننگا۔ اسہ سوج اسے نا ورندی ٹی ترجمان دفترخارجہ پارے کہ مقبوضہ کشمیر اٹی برجا بھارتی ظلم اٹی پین 5 کشمیری تے شہید کننگا۔ دا کشمیری تیٹی اسہ ورناطالب علم اس ہم ئسک۔ بھارت پین اسٹ ءِ آخا بلکن تینے بیوقوف جوڑ کننگ ءِ۔ اسہ سوج اسے نا ورندی ٹی اوپارے کہ بھارت نا سلامتی کونسل اٹ آخبتی نمائندگی نا بابت پاکستان نا بارواٹ رپورٹ آک سٹی ءُ۔ امریکی سیکرٹری خارجہ تون اوڑدہی ٹی بھارت نا مخ تفی نا بابت ہچ ءُ ہیت اس متنے۔
